ఉదయాన్నే కనిపించే ప్రీడయాబెటిస్ లక్షణాలు ఎలా ఉంటాయి..? 

సాక్షి లైఫ్ : పొద్దున్నే లేవగానే మీకు అలసటగా లేదా బద్దకంగా అనిపిస్తుందా? అయితే మీరు కొన్ని ఇతర లక్షణాలను కూడా గమనించాలి. ప్రీడయాబెటిస్ లక్షణాలు ఉదయం పూట కనిపిస్తాయి. అటువంటివాటిలో అలసట, బద్దకం వంటి లక్షణాలు ఉంటాయి. ఈ లక్షణాలను సకాలంలో గుర్తించడం ద్వారా ప్రీడయాబెటిస్‌ను తర్వాతి దశకు అంటే మధుమేహంగా మారకుండా నివారించవచ్చు.

ఇది కూడా చదవండి.. నల్ల ఉప్పుతో ఆరోగ్య ప్రయోజనాలివే 

ఇది కూడా చదవండి.. ఋతు పరిశుభ్రత దినోత్సవం చరిత్ర, ప్రాముఖ్యత..

ఇది కూడా చదవండి.. టాటూ వేయించుకున్న వాళ్లు రక్తదానంచేయకూడదా..?

మధుమేహం వేగంగా వ్యాపిస్తున్న ఒక వ్యాధి. ఇది ఇప్పుడు కేవలం వృద్ధుల సమస్య మాత్రమే కాదు, యువత కూడా దీని బారిన పడుతున్నారు. అయితే, ఈ వ్యాధి ప్రారంభ దశలో (Prediabetes Symptoms) గుర్తించినట్లయితే, అది మధుమేహంగా మారకుండా నివారించవచ్చు. ఈ దశను ప్రీడయాబెటిస్ అంటారు.

ఈ దశలో షుగర్ లెవెల్స్ ఎక్కువగా ఉంటాయి, కానీ దాన్ని డయాబెటిస్ అని అనలేం. అందువల్ల, ఇది ఒక హెచ్చరిక లాంటిది, జాగ్రత్తగా ఉండకపోతే డయాబెటిస్ వచ్చే అవకాశం ఉంటుంది.ఈ దశలో జీవనశైలిలో మార్పులు చేసుకోవడం ద్వారా దీనిని పూర్తిగా నివారించవచ్చు. దీనికి సంబంధించిన కొన్ని లక్షణాలు ఉదయం పూట కనిపిస్తాయి, వీటి సహాయంతో దీన్ని త్వరగా గుర్తించవచ్చు. ప్రీడయాబెటిస్ లక్షణాలు ఎలా ఉంటాయో ఇప్పుడు తెలుసుకుందాం..

ఉదయం లేవగానే బాగా అలసట, నిద్రమత్తుగా అనిపించడం.. 

రాత్రి పూర్తి నిద్ర పోయిన తర్వాత కూడా ఉదయం లేచినప్పుడు అలసిపోయినట్లు అనిపిస్తే, అది ఆందోళన కలిగించే విషయం. ప్రీడయాబెటిస్ ఉన్నప్పుడు శరీరంలోని కణాలు ఇన్సులిన్‌ను సరిగ్గా ఉపయోగించుకోలేవు, దీనివల్ల గ్లూకోజ్ శక్తిగా మారదు. దీనివల్ల, శరీరానికి, మెదడుకు తక్కువ శక్తి లభిస్తుంది, దీనితో రోజు ప్రారంభమే అలసటతో మొదలవుతుంది.

నోరు పొడిబారడం, మాటిమాటికి దాహం వేయడం.. 

పొద్దున్నే లేవగానే మీకు బాగా దాహం వేసి, నోరు పొడిగా అనిపిస్తే, ఇది ప్రీడయాబెటిస్ ముఖ్య లక్షణం. రక్తంలో షుగర్ శాతం పెరిగినప్పుడు, శరీరం దానిని పలచగా చేసి కిడ్నీల ద్వారా బయటకు పంపించడానికి ప్రయత్నిస్తుంది. ఈ ప్రక్రియకు శరీరానికి ఎక్కువ నీరు అవసరం అవుతుంది, దీనివల్ల డీహైడ్రేషన్ ఏర్పడుతుంది, మాటిమాటికి దాహం వేస్తుంది.

కంటి చూపు మసకబారడం.. 

పొద్దున లేవగానే పేపర్ చదవడానికి లేదా మొబైల్ చూడటానికి మీకు ఇబ్బందిగా అనిపిస్తుందా లేదా కంటి చూపు మసకబారుతుందా? అయితే, ఇది ప్రీడయాబెటిస్ లక్షణమే. రక్తంలో గ్లూకోజ్ స్థాయి పెరిగితే కంటి లెన్స్‌లో వాపు రావచ్చు, దీనివల్ల దాని ఆకారం మారి, దృష్టి కేంద్రీకరించే సామర్థ్యం ప్రభావితమవుతుంది. రక్తంలో షుగర్ నియంత్రణలో ఉంచడం ద్వారా ఈ సమస్యను పరిష్కరించవచ్చు.

ఉదయం పూట తల తిరగడం లేదా బలహీనంగా అనిపించడం.. 

రాత్రంతా ఉపవాసం తర్వాత ఉదయం రక్తంలో షుగర్ స్థాయి తక్కువగా ఉండవచ్చు, కానీ ప్రీడయాబెటిస్‌లో ఈ హెచ్చుతగ్గులు ఎక్కువగా ఉంటాయి. కొన్నిసార్లు షుగర్ స్థాయి అకస్మాత్తుగా పడిపోవచ్చు, దీనివల్ల తల తిరగడం, వణుకు, చెమట పట్టడం లేదా బలహీనంగా అనిపించవచ్చు. ఇది శరీరం గ్లూకోజ్‌ను నిర్వహించలేకపోతుందనే సంకేతం.

 ఎక్కువగా మూత్ర విసర్జన చేయడం.. 

రాత్రిపూట మాటిమాటికి మూత్ర విసర్జన కోసం లేవవలసి వస్తే, ఉదయం కూడా అలాగే కొనసాగితే, దీనిపై దృష్టి పెట్టండి. అదనపు షుగర్‌ను శరీరం నుంచి బయటకు పంపించడానికి కిడ్నీలు ఎక్కువగా పనిచేస్తాయి, దీనివల్ల మూత్ర విసర్జనకు వెళ్లాల్సి న అవసరం పెరుగుతుంది. ఇది ప్రీడయాబెటిస్ లక్షణంగా పరిగణిస్తారు.

ఏం చేయాలి మరి..?

ఈ లక్షణాలలో ఏవి కనిపించినా భయపడకండి, అప్రమత్తంగా ఉండండి. ముందుగా ఒక డాక్టర్‌ను కలిసి మీ ఫాస్టింగ్ బ్లడ్ షుగర్, HbA1c టెస్ట్ చేయించుకోండి. డాక్టర్ చెప్పిన జీవనశైలి మార్పులను పాటించడం ద్వారా ఆయా సమస్య నుంచి బయట పడొచ్చు.

ఇది కూడా చదవండి.. వేగంగా బరువు తగ్గించే ఓట్జెంపిక్ డ్రింక్ ట్రెండ్.. డైటీషియన్లు ఏమంటున్నారంటే..? 

ఇది కూడా చదవండి.. హిమోఫిలియాకు ప్రధాన కారణాలు తెలుసా..?

ఇది కూడా చదవండి.. లివర్ సంబంధిత సమస్యలను ఎలా గుర్తించాలి..? 

గమనిక: ఇది కేవలం సమాచారంగా మాత్రమే భావించండి.. ఈ సమాచారం ఆధారంగా ఆరోగ్య సమస్యలకు సంబంధించిన నిర్ణయాలు తీసుకోవద్దు. అందుకోసం వైద్య నిపుణులను సంప్రదించండి.