Chia Seeds : చియా గింజలను నానబెట్టకుండా తినకూడదా..?

సాక్షి లైఫ్ : బరువు తగ్గడానికీ, జీర్ణక్రియను మెరుగుపరచుకోవ డానికీ నేటితరం ఎక్కువగా ఆశ్రయిస్తున్న పోషకాహారాల్లో చియా గింజలు (Chia seeds) ప్రధానమైనవి. నీరు, పాలు, పెరుగు లేదా స్మూతీల్లో వీటిని కలిపి తీసుకోవడం ఆరోగ్యకరమైన అలవాటే. అయితే, వీటిని తీసుకునే విధానం అత్యంత కీలకమని పోషకాహార నిపుణులు హెచ్చరిస్తున్నారు. సరైన అవగాహన లేకుండా పొడి గింజలను నేరుగా మింగేస్తే ఊహించని ఆరోగ్య సమస్యలు కొనితెచ్చుకున్నట్లే.

ఇది కూడా చదవండి..టిపికల్ ఫీవర్స్ అంటే ఏమిటి..? వాటి లక్షణాలు ఎలా ఉంటాయి..?

ఇది కూడా చదవండి..చిన్నారులలో అరుదైన జన్యుపరమైన వ్యాధుల నిర్ధారణకు సరికొత్త రక్త పరీక్ష.. 

ఇది కూడా చదవండి..రోజూ బెల్లం తింటే బరువు పెరుగుతారా..? 

పొడిగా ఎందుకు మింగకూడదు..?

చియా గింజలకు తేమను త్వరగా పీల్చుకునే గుణం ఉంటుంది. ఇవి ద్రవాలతో కలిసినప్పుడు తమ పరిమాణం కంటే అనేక రెట్లు ఉబ్బి జెల్లీలా మారతాయి. ఒకవేళ వీటిని నానబెట్టకుండా నేరుగా మింగి, తగినంత నీరు తాగకపోతే.. అవి అన్నవాహిక (food pipe) లేదా జీర్ణకోశంలో ఉన్న తేమను పీల్చుకుని అక్కడే ఉబ్బిపోతాయి. దీనివల్ల గొంతులో అడ్డుపడటం, ఊపిరాడకపోవడం వంటి ప్రమాదాలు సంభవించవచ్చు. ముఖ్యంగా ఆహారాన్ని మింగడంలో సమస్యలు ఉన్నవారు ఈ విషయంలో మరింత అప్రమత్తంగా ఉండాలి.

తినే సరైన విధానం ఇదే..

నానబెట్టడం తప్పనిసరి: చియా గింజలను కనీసం 15 నుంచి 30 నిమిషాల పాటు నీటిలో లేదా పాలలో నానబెట్టాలి. అవి మెత్తబడి జెల్లీ రూపంలోకి మారిన తర్వాతే తీసుకోవడం సురక్షితం. ఆహారంతో కలిపి..నానబెట్టిన గింజలను ఓట్స్, సలాడ్లు, పెరుగు, పండ్ల రసాలు లేదా స్మూతీల్లో కలుపుకుని నిరభ్యంతరంగా తీసుకోవచ్చు.

తగినంత నీరు తాగాలి: వీటిలో పీచు పదార్థం (fiber) చాలా ఎక్కువగా ఉంటుంది. కాబట్టి వీటిని తీసుకున్న రోజు శరీరానికి అవసరమైన మోతాదులో మంచినీళ్లు తప్పనిసరిగా తాగాలి.

కొద్ది మొత్తంతోనే ఆరంభం: వీటిని కొత్తగా ఆహారంలో చేర్చుకునేవారు ఒకేసారి ఎక్కువ పరిమాణంలో తీసుకోకూడదు. అకస్మాత్తుగా ఎక్కువ ఫైబర్ శరీరానికి అందితే కడుపుబ్బరం, గ్యాస్, మలబద్ధకం వంటి సమస్యలు రావచ్చు. రోజుకు ఒక చిన్న టీస్పూన్‌తో మొదలుపెట్టి క్రమంగా మోతాదు పెంచుకోవాలి.

లభించే ప్రయోజనాలు..

చియా గింజల్లో ఒమేగా-3 ఫ్యాటీ యాసిడ్లు, మొక్కల ఆధారిత ప్రొటీన్లు, పీచు, కీలక ఖనిజాలు పుష్కలంగా ఉంటాయి. వీటిలోని ఫైబర్ జీర్ణవ్యవస్థ పనితీరును మెరుగుపరచడంతో పాటు ఎక్కువసేపు కడుపు నిండిన భావనను కలిగిస్తుంది. ఫలితంగా అనవసరంగా చిరుతిళ్లు తినే అలవాటు తగ్గి బరువు నియంత్రణకు దోహదపడుతుంది. అయితే ఇవి ఆరోగ్యకరమైన జీవనశైలిలో భాగం మాత్రమే తప్ప, ఏదైనా వ్యాధికి దివ్యౌషధం కావని గుర్తించాలి.

వీరు అప్రమత్తంగా ఉండాలి..

గొంతు సంబంధిత సమస్యలు, ఆహారాన్ని మింగడంలో ఇబ్బంది, తీవ్రమైన పేగు సమస్యలు లేదా గింజల వల్ల అలర్జీలు వచ్చే వారు వైద్యులు లేదా డైటీషియన్ల సలహా మేరకే వీటిని తీసుకోవాలి. ఒకవేళ చియా గింజలు తిన్న తర్వాత గొంతు పట్టేసినట్లు అనిపించినా, తీవ్రమైన కడుపునొప్పి, వాంతులు లేదా శ్వాస తీసుకోవడంలో అసౌకర్యం కలిగినా ఏమాత్రం నిర్లక్ష్యం చేయకుండా తక్షణమే వైద్యులను సంప్రదించాలి.

ఇది కూడా చదవండి.. మీరు ఆరోగ్యంగా బరువు తగ్గాలంటే..? 

ఇది కూడా చదవండి..అధిక బరువు తగ్గాలంటే రోజుకి ఎన్ని క్యాలరీలు బర్న్ అవ్వాలి..? 

ఇది కూడా చదవండి.. టీబీని సకాలంలో గుర్తించకపోతే ఏమౌతుంది..? 

 ఇది కూడా చదవండి.. ఎర్ర రక్త కణాలు, తెల్ల రక్త కణాల మధ్య వ్యత్యాసం..?

గమనిక: ఇది కేవలం సమాచారంగా మాత్రమే భావించండి.. ఈ సమాచారం ఆధారంగా ఆరోగ్య సమస్యలకు సంబంధించిన నిర్ణయాలు తీసుకోవద్దు. అందుకోసం వైద్య నిపుణులను సంప్రదించండి.