Boost Immunity : కాలుష్య కోరల నుంచి కాపాడే 'రోగనిరోధక శక్తి'ని అందించే ఆహారం..!

సాక్షి లైఫ్ : ప్రస్తుతం దేశవ్యాప్తంగా వాయు కాలుష్యం తీవ్రస్థాయికి చేరుకుంటోంది. కలుషిత గాలిలోని సూక్ష్మ కణాలు కళ్లు, గొంతు, ఊపిరితిత్తులపై తీవ్ర ప్రభావం చూపుతూ అనారోగ్యాల పాలుచేస్తున్నాయి. ఇలాంటి విపత్కర పరిస్థితుల్లో మన ఆరోగ్యాన్ని కాపాడుకోవాలంటే.. పటిష్టమైన రోగనిరోధక వ్యవస్థ (immune system) ఎంతో అవసరం. రోజువారీ ఆహారంలో సరైన మార్పులు చేసుకోవడం ద్వారా ఈ కాలుష్య ముప్పును కొంతవరకు తిప్పికొట్టవచ్చని ఆరోగ్య నిపుణులు సూచిస్తున్నారు. కాలుష్య వాతావరణంలో ఇమ్యూనిటీని పెంచుకోవడానికి ఎలాంటి ఆహారం తీసుకోవాలో చూద్దాం..

ఇది కూడా చదవండి..బ్లడ్ క్యాన్సర్‌లో ఎన్ని రకాలు ఉన్నాయి..?

ఇది కూడా చదవండి..మార్నింగ్ వాక్ చేసేటపుడు ఈ ఆరు విషయాలు గుర్తుంచుకోండి..ఎందుకంటే..?

ఇది కూడా చదవండి..అధిక బరువు తగ్గాలంటే రోజుకి ఎన్ని క్యాలరీలు బర్న్ అవ్వాలి..? 

1. విటమిన్-సి పండ్లు..

ఉసిరి, జామ, నారింజ, బత్తాయి, నిమ్మ, కివీ పండ్లలో విటమిన్-సి పుష్కలంగా ఉంటుంది. ఇది శరీరంలో యాంటీ ఆక్సిడెంట్లుగా పనిచేసి రోగనిరోధక వ్యవస్థను బలోపేతం చేస్తుంది. జ్యూస్‌ల రూపంలో కంటే పండ్లను నేరుగా ముక్కలుగా కోసుకుని తినడమే మంచిది. రోజూ ఒకే రకం కాకుండా సీజనల్‌గా దొరికే రకరకాల పండ్లను ఆహారంలో చేర్చుకోవాలి.

2. ఆకుపచ్చని కూరగాయలు..

పాలకూర, మెంతికూర, బ్రొకోలీ లాంటి ఆకుకూరల్లో విటమిన్లు, మినరల్స్, ఫైబర్, యాంటీ ఆక్సిడెంట్లు మెండుగా ఉంటాయి. ఇవి శరీరం చురుగ్గా పనిచేసేలా చేస్తాయి. ఆకుకూరలను వాడేముందు శుభ్రంగా కడిగి వండుకోవాలి. వీటితో పాటు రంగురంగుల కూరగాయలను సైతం డైట్‌లో భాగం చేసుకోవాలి.

3. బాదం, వాల్‌నట్స్..

డ్రైఫ్రూట్స్‌లో ఆరోగ్యకరమైన కొవ్వులు, ప్రోటీన్లు ఉంటాయి. ముఖ్యంగా వాల్‌నట్స్‌లో ఒమేగా-3 ఫ్యాటీ యాసిడ్స్, బాదంలో విటమిన్-ఇ అధికంగా ఉంటాయి. ఉప్పు లేదా చక్కెర కలపని డ్రైఫ్రూట్స్‌ను ఉదయం లేదా సాయంత్రం స్నాక్స్‌ రూపంలో మితంగా తీసుకోవాలి. ఏవైనా గింజల వల్ల అలర్జీలు ఉంటే వాటికి దూరంగా ఉండటం ఉత్తమం.

4. ప్రోటీన్ అందించే పప్పులు..

శరీరంలో దెబ్బతిన్న కణాల మరమ్మతుకు, కండరాల నిర్మాణానికి ప్రోటీన్ ఎంతో అవసరం. పప్పులు, శెనగలు, రాజ్‌మా, సోయాబీన్, గుడ్లు, పాలు, పెరుగు లాంటి వాటిని రోజూవారీ ఆహారంలో ఉండేలా చూసుకోవాలి. శాఖాహారులు పప్పుధాన్యాల ద్వారా తగినంత ప్రోటీన్ పొందేలా జాగ్రత్తపడాలి.

5. పసుపు, అల్లం..

భారతీయ వంటకాల్లో వీటికి ప్రత్యేక స్థానం ఉంది. పసుపు, అల్లంలో ఉండే యాంటీ ఇన్ఫ్లమేటరీ, యాంటీ ఆక్సిడెంట్ గుణాలు కాలుష్యం వల్ల వచ్చే గొంతు మంట, వాపుల నుంచి ఉపశమనం ఇస్తాయి. రోజువారీ కూరలు, సూప్‌లలో పసుపు వాడటం, అల్లం టీ లాంటివి తాగడం మంచిది. అయితే వైద్యుల సలహా లేకుండా వీటి సప్లిమెంట్స్ అధిక మోతాదులో వాడకూడదు.

6. తగినన్ని నీళ్లు..

శరీరం డీహైడ్రేషన్ బారిన పడకుండా ఉండాలంటే రోజుకు తగినన్ని నీళ్లు తాగాలి. దీనివల్ల శరీరంలోని జీవక్రియలు సక్రమంగా సాగుతాయి. వాతావరణం, మీ శారీరక శ్రమను బట్టి నీటితో పాటు ద్రవ పదార్థాలు ఎక్కువగా తీసుకుంటూ ఉండాలి. వేడి వేడి వెజ్ లేదా నాన్-వెజ్ సూప్‌లు కూడా మంచి ఎంపిక.

ఇది కూడా చదవండి..మీరు ఆరోగ్యంగా బరువు తగ్గాలంటే..? 

ఇది కూడా చదవండి..గుండె నొప్పిని ఎలా గుర్తించవచ్చు..?

ఇది కూడా చదవండి..కొరియన్ డైట్ తో వేగంగా బరువు తగ్గడం ఎలా..?  

గమనిక: ఇది కేవలంసమాచారంగా మాత్రమే భావించండి.. ఈ సమాచారం ఆధారంగా ఆరోగ్య సమస్యలకు సంబంధించిన నిర్ణయాలు తీసుకోవద్దు. అందుకోసం వైద్య నిపుణులను సంప్రదించండి..