ఇంట్లోకి దోమలు రాకుండా చిట్కాలు.. 

సాక్షి లైఫ్ : ఇంట్లో దోమలు రాకుండా ఉండడానికి చాలామంది రకరకాల మందులు చల్లుతుంటారు. వీటిల్లో ఎక్కువగా రసాయనిక మందులు వాడడం వల్ల అటు దోమలతోపాటు ఇటు దోమలకు వేసిన మందుల కారణంగా అనేక అనారోగ్య సమస్యలు ఎదుర్కోవాల్సి వస్తోంది. చిన్నగా కనిపించే ఈ దోమలు డెంగ్యూ, మలేరియా వంటి ప్రమాదకరమైన వ్యాధులకు కారణమవుతాయి. అందువల్ల వాటిని నివారించడం చాలా ముఖ్యం.

ఇది కూడా చదవండి.. ఫ్యాటీ లివర్ అంటే ఏమిటి..?  

దోమలను తరిమికొట్టేందుకు మార్కెట్‌లో అనేక రకాల ఉత్పత్తులు అందుబాటులో ఉన్నప్పటికీ, వాటిలో చాలా వరకు ఆరోగ్యానికి హాని కలిగిస్తాయి. పైగా ఇవి దోమలపై అంతగా ప్రభావం చూపకపోగా దుష్ప్రభావాలకు కారణమవుతాయి. అటువంటి పరిస్థితిలో మీరు దోమలను నివారించడానికి సహజమైన విధానాలను అనుసరించాలి. కొన్ని ప్రత్యేక రకాల మొక్కలు దోమలను నివారించడంలో చాలా ప్రభావవంతంగా ఉంటాయి. అవేంటంటే..?  

నిమ్మగడ్డి..

నిమ్మగడ్డి వాసనకు దోమలు పారిపోతాయి. ఇంటి బాల్కనీలో లేదా కిటికీ దగ్గర నిమ్మగడ్డి మొక్క ను ఉంచండి. ఇందులో అనేక ఔషధ గుణాలున్నాయి. నిమ్మగడ్డి మొక్కతో పాటు, లెమన్‌గ్రాస్ నూనె కూడా దోమలను తరిమికొట్టడంలో ప్రభావవంతంగా ఉంటుంది. ఇందులో లిమోనెన్ , సిట్రోనెల్లా వంటి మూలకాలు ఉంటాయి. ఇవి దోమలను దూరంగా ఉంచుతాయి. లెమన్ గ్రాస్ మొక్కలను నేరుగా భూమిలో నాటవచ్చు. ఇది సూర్యకాంతిలో బాగా పెరుగుతుంది. దీని కోసం, మట్టి, కంపోస్ట్ ,ఇసుకతో కూడిన నేల అనుకూలంగా ఉంటుంది. 

బంతి పువ్వు..
 

 బంతి పువ్వు పువ్వులు మీ ఇంటి బాల్కనీ అందాన్ని పెంచడమే కాకుండా, దోమలు, ఇతర కీటకాలను దూరంగా ఉంచుతాయి. ఈ మొక్క నుండి వచ్చే వాసన పైరెత్రమ్, సపోనిన్, స్కోపోలెటిన్, కాడినోల్ వంటి  మూలకాలుంటాయి. ఇవి మీ ఇంట్లోకి దోమలను రాకుండా చేస్తాయి.

లావెండర్.. 

లావెండర్ మొక్క ఈగలు, దోమలు, సాలెపురుగులు,చీమలను దూరంగా ఉంచడానికి పనిచేస్తుంది. ఆహ్లాదకరమైన సువాసనతో లావెండర్ మొక్క కూడా చాలా అందంగా కనిపిస్తుంది. ఈ మొక్కలను ఆయుర్వేద వైద్యంలో ఉపయోగిస్తారు. ఈ మొక్క ఆకులను నేరుగా చర్మంపై కూడా రుద్దవచ్చు. దీని ఆకుల నుంచి విడుదలయ్యే నూనె కీటకాల నుంచి మిమ్మల్ని రక్షిస్తుంది.

 రోజ్‌మేరీ.. 

ఇది అందమైన, సువాసనగల మొక్క. దీని ఆకులు సన్నగా, పదునుగా ఉంటాయి. వేసవిలో పూసే ఈ మొక్క కాండం సువాసన వల్ల దోమలు దరి చేరవు. దోమల నుంచి ఇంటిని సురక్షితంగా ఉంచడానికి, ఇంట్లో   రోజ్‌మేరీ మొక్కను నాటండి.

తులసి మొక్క.. 

తులసి మొక్క సువాసన దోమలను తరిమికొడుతుంది. కొన్ని తులసి ఆకులను కడిగి ఒక పాత్రలో వేసి కొన్ని నీళ్లు పోసి మరిగించండి .. ఆ నీటిని  చల్లారిన కొంత సమయం తర్వాత, నీటి నుంచి ఆకులను వేరు చేయండి. అనంతరం ఆ నీటిని స్ప్రే బాటిల్‌లో పోయండి. సాయంత్రం బయటకు వెళ్లే ముందు ఈ నీటిని చేతులు, మెడ, కాళ్లపై పిచికారీ చేసుకుంటే దోమలు కుట్టవు.

 ఇది కూడా చదవండి.. క్షయవ్యాధి ఏయే అవయవాలపై ప్రభావం చూపుతుంది..? 

గమనిక: ఇది కేవలం సమాచారంగా మాత్రమే భావించండి.. ఈ సమాచారం ఆధారంగా ఆరోగ్య సమస్యలకు సంబంధించిన నిర్ణయాలు తీసుకోవద్దు. అందుకోసం వైద్య నిపుణులను సంప్రదించండి.