Research : రోజూ కాఫీ తాగితే తగ్గనున్న కాలేయ క్యాన్సర్ ముప్పు.. 

సాక్షి లైఫ్ : కాఫీ ప్రియులకు ఇది నిజంగా తీపికబురే! ప్రతి రోజూ మన ఉదయాన్ని ఉల్లాసంగా మార్చే ఒక కప్పు కాఫీ.. కేవలం శక్తిని మాత్రమే కాదు, అత్యంత ప్రమాదకరమైన కాలేయ క్యాన్సర్ (Liver Cancer) ముప్పును కూడా గణనీయంగా తగ్గిస్తుందని తాజా అంతర్జాతీయ పరిశోధనల్లో వెల్లడైంది. ప్రపంచవ్యాప్తంగా క్యాన్సర్ మరణాలకు వేగంగా పెరుగుతున్న కారణాలలో కాలేయ క్యాన్సర్ ఒకటిగా ఉన్న నేపథ్యంలో, ఈ పరిశోధన ఫలితాలు వైద్య ప్రపంచంలో కొత్త ఆశలు రేకెత్తిస్తున్నాయి.

ఇది కూడా చదవండి..హార్ట్ ఎటాక్ తర్వాత తొలి 60 నిమిషాలు ఎందుకంత కీలకం..?

ఇది కూడా చదవండి..విటమిన్ సి లోపించినప్పుడు కనిపించే ముఖ్య లక్షణాలు ఇవే.. 

ఇది కూడా చదవండి.. లివర్ డ్యామేజ్ అయితే ఏం జరుగుతుంది..?  

 పరిశోధన ఏం చెబుతోంది అంటే..?

సుమారు లక్షన్నర మందికి పైగా పాల్గొన్న అధ్యయనాల విశ్లేషణలో ఈ ఆసక్తికర విషయం బయటపడిందని పలు అంతర్జాతీయ జర్నల్స్‌లో ప్రచురించిన నివేదికలు వెల్లడిస్తున్నాయి. రోజూ కాఫీ తాగే వారిలో, అసలు తాగని వారితో పోలిస్తే, హెపటోసెల్ల్యులర్ కార్సినోమా (Hepatocellular Carcinoma) అనే అత్యంత సాధారణ కాలేయ క్యాన్సర్ వచ్చే ప్రమాదం 35శాతం నుంచి 43శాతం వరకు తగ్గుతుందని తేలింది. మోతాదు ముఖ్యం.. రోజుకు రెండు నుంచి నాలుగు కప్పుల కాఫీ తీసుకోవడం వల్ల అత్యధిక రక్షణ లభించవచ్చని నిపుణులు సూచిస్తున్నారు.

  కాఫీ ఎలా పనిచేస్తుంది అంటే..?

కేవలం కెఫీన్ మాత్రమే కాదు, కాఫీలో ఉండే వెయ్యికి పైగా జీవసంబంధ క్రియాశీల సమ్మేళనాలు (Bioactive Compounds) దీనికి కారణమని శాస్త్రవేత్తలు చెబుతున్నారు. కాఫీలో ఉండే పాలీఫెనాల్స్, క్లోరోజెనిక్ ఆసిడ్ వంటి శక్తిమంతమైన యాంటీఆక్సిడెంట్లు.. కాలేయంలోని కణాలను దెబ్బతీసే ఆక్సీకరణ ఒత్తిడి (Oxidative Stress) దీర్ఘకాలిక వాపు (Chronic Inflammation)ను తగ్గిస్తాయి. ఈ సమ్మేళనాలు కాలేయ నష్టాన్ని, ముఖ్యంగా సిర్రోసిస్ (Cirrhosis) అభివృద్ధిని ఆలస్యం చేయడంలో సహాయపడతాయని అధ్యయనాలు పేర్కొన్నాయి.

బ్లాక్ కాఫీ, ఫిల్టర్ కాఫీ, ఇన్‌స్టంట్ కాఫీ - ఇలా ఏ రకమైన కాఫీ అయినా ప్రయోజనకరంగానే ఉన్నప్పటికీ... పంచదార, అధిక పాలు, క్రీములు లేకుండా తాగితేనే కాలేయానికి పూర్తి ఆరోగ్య ప్రయోజనం చేకూరుతుందని నిపుణులు హెచ్చరిస్తున్నారు.

అయితే, కాఫీ తాగడం అనేది కేవలం ఒక అలవాటు మాత్రమేనని, ఇది ధూమపానం, అతిగా మద్యం సేవించడం, ఊబకాయం లేదా హెపటైటిస్ వంటి అధిక ప్రమాదకరమైన అలవాట్ల వల్ల వచ్చే నష్టాన్ని పూర్తిగా భర్తీ చేయదని పరిశోధకులు స్పష్టం చేశారు. ఆరోగ్యకరమైన జీవనశైలి, సమతుల్య ఆహారం,క్రమం తప్పకుండా వైద్య పరీక్షలతో పాటు కాఫీని తీసుకోవడం మంచిదని వారు సూచిస్తున్నారు.

ఇది కూడా చదవండి..Hot Yoga : హాట్ యోగా ఎలాంటి వాళ్లు చేయకూడదు ఎందుకు..?

ఇది కూడా చదవండి..Acanthosis Nigricans : అకాంథోసిస్ నైగ్రికన్స్ అంటే ఏమిటి..?

గమనిక: ఇది కేవలం సమాచారంగా మాత్రమే భావించండి.. ఈ సమాచారం ఆధారంగా ఆరోగ్య సమస్యలకు సంబంధించిన నిర్ణయాలు తీసుకోవద్దు. అందుకోసం వైద్య నిపుణులను సంప్రదించండి.