Testosterone : విటమిన్ 'డి' లోపంతో విడాకుల వరకు..! అసలు విషయం ఏమిటంటే..?

సాక్షి లైఫ్ : సూర్యరశ్మి పుష్కలంగా లభించే భారతదేశం లాంటి దేశంలో దాదాపు 70 నుంచి 80 శాతం మంది విటమిన్ 'డి' (Vitamin D) లోపంతో బాధపడుతుండటం గమనార్హం. కేవలం ఎముకల బలహీనతకు మాత్రమే పరిమితం అనుకునే ఈ 'సన్‌షైన్ విటమిన్' లోపం.. చివరకు ఒక దంపతుల మధ్య విడాకులకు దారితీసిన ఉదంతం వైద్య వర్గాల్లో తీవ్ర చర్చనీయాంశమైంది. మానసిక ఒత్తిడి, శారీరక నొప్పులు, లైంగిక సమస్యలు ఒకరి వైవాహిక జీవితాన్ని ఎలా దెబ్బతీస్తాయనే కోణంలో తాజా అధ్యయనాలు దిగ్భ్రాంతికర నిజాలను వెల్లడిస్తున్నాయి.

ఇది కూడా చదవండి.. పీడకలలు రావడానికి కారణాలేంటి..? 

ఇది కూడా చదవండి.. ప్రాణాంతకమైన వ్యాధులకు కారణమయ్యే జంతువులు.. 

ఇది కూడా చదవండి.. వేసవికాలంలో కళ్లను కాపాడుకునేదెలా..?  

ఆ ఒక్క లోపంతో.. దాంపత్య జీవితంలో ఎడబాటు..!

ప్రముఖ మెడికల్ కన్సల్టెంట్లు వెల్లడించిన ఒక కేసు వివరాల ప్రకారం.. 35 ఏళ్ల ఒక యువకుడు తీవ్రమైన కండరాల నొప్పులు, అలసట, జుట్టు రాలడం, తీవ్రమైన డిప్రెషన్, అంగస్తంభన లోపం (Erectile Dysfunction) వంటి సమస్యలతో బాధపడ్డాడు. ఈ సమస్యల ప్రభావం అతని దాంపత్య జీవితంపై పడి, భార్యాభర్తల మధ్య తీవ్ర మనస్పర్థలు వచ్చి చివరకు విడాకుల వరకు వెళ్ళింది. అయితే, సదరు వ్యక్తికి పూర్తి స్థాయి వైద్య పరీక్షలు నిర్వహించగా, అతని రక్తంలో విటమిన్ 'డి' స్థాయిలు కేవలం 2 ng/mL మాత్రమే ఉన్నట్లు తేలింది. సాధారణంగా శరీరంలో ఈ విటమిన్ స్థాయి 30 నుంచి 60 ng/mL మధ్య ఉండాలి. కేవలం విటమిన్ డి లోపాన్ని సవరించడం ద్వారా అతని ఆరోగ్యం మళ్లీ కుదుటపడటం విశేషం.

టెస్టోస్టెరాన్ బూస్టింగ్..

పురుషుల లైంగిక ఆరోగ్యం, సంతానోత్పత్తిపై విటమిన్ 'డి' ప్రభావం..శరీరంలోని హార్మోన్ల వ్యవస్థను, రక్త ప్రసరణను క్రమబద్ధీకరించడంలో విటమిన్ డి కీలక పాత్ర పోషిస్తుందని తాజా అంతర్జాతీయ పరిశోధనలు స్పష్టం చేస్తున్నాయి. టెస్టోస్టెరాన్ బూస్టింగ్.. పురుషుల ప్రాథమిక లైంగిక హార్మోన్ అయిన 'టెస్టోస్టెరాన్' ఉత్పత్తికి, విటమిన్ డి స్థాయిలకు ప్రత్యక్ష సంబంధం ఉందని తేలింది.

వీర్యకణాల నాణ్యత: పురుషుల పునరుత్పత్తి కణజాలాలలో విటమిన్ డి గ్రాహకాలు (Receptors) ఉంటాయి. ఈ విటమిన్ తగినంత ఉంటేనే వీర్యకణాల చలనం (Motility), నాణ్యత మెరుగ్గా ఉండి సంతానోత్పత్తి అవకాశాలు పెరుగుతాయి.

రక్త ప్రసరణ - అంగస్తంభన లోపం..

అంగస్తంభన ప్రక్రియ అనేది పూర్తిగా ధమనులలో ఆరోగ్యకరమైన రక్త ప్రసరణపై ఆధారపడి ఉంటుంది. విటమిన్ "డి" లోపిస్తే రక్తనాళాల పనితీరు (Endothelial Function) దెబ్బతింటుంది. ఇది అంగస్తంభన లోపానికి ప్రధాన కారణమవడమే కాకుండా.. గుండె జబ్బులు, హైబీపీ ముప్పును పెంచుతుంది. వంధ్యత్వానికి లేదా లైంగిక సమస్యలకు కేవలం విటమిన్ డి లోపం మాత్రమే ఏకైక కారణం కాదు. వయస్సు, ధూమపానం, స్థూలకాయం, మధుమేహం, జీవనశైలి వంటి అనేక ఇతర అంశాలు కూడా దీనిపై ప్రభావం చూపుతాయి.

విటమిన్ డి లోపాన్ని జయించే మార్గాలు.. 

ఈ విటమిన్ లోపం నుంచి సులభంగా బయటపడటానికి వైద్య నిపుణులు సూచిస్తున్న కీలక మార్గాలు

వైద్యుల సలహా తప్పనిసరి..

ఇంటికే పరిమితం కావడం (Sedentary Lifestyle), ఎండ తగలకపోవడం వల్లనే నేటి తరం యువతలో ఈ సమస్య ఎక్కువగా కనిపిస్తోంది. మీలో కూడా విపరీతమైన అలసట, కీళ్ల నొప్పులు, మానసిక ఆందోళన వంటి లక్షణాలు ఉంటే వెంటనే '25-హైడ్రాక్సీ విటమిన్ డి' (25-hydroxy vitamin D) బ్లడ్ టెస్ట్ చేయించుకోవాలి. లోపం తీవ్రంగా ఉన్నట్లయితే సొంత నిర్ణయాలు తీసుకోకుండా, వైద్యుల సలహా మేరకు మాత్రమే నిర్దేశిత పరిమాణంలో విటమిన్ డి సప్లిమెంట్లు (టాబ్లెట్లు లేదా సిరప్స్) వాడాల్సి ఉంటుంది.

విటమిన్ డి లభించే వనరులు.. తీసుకోవాల్సిన విధానం..

శరీరానికి ఎంతో అవసరమైన విటమిన్ డిని సమకూర్చుకోవడానికి ప్రధానంగా మూడు రకాల వనరులు దోహదపడతాయి. మొదటిగా, అత్యంత సహజమైన సూర్యరశ్మి (Sunlight) ద్వారా దీనిని ఉచితంగా పొందవచ్చు. ఇందుకోసం ప్రతిరోజూ ఉదయం లేదా సాయంత్రం వేళల్లో కనీసం 15 నుంచి 30 నిమిషాల పాటు ఎండలో గడపడం మంచిది. రెండవది, మనం తీసుకునే రోజువారీ ఆహార పదార్థాల ద్వారా కూడా ఈ విటమిన్‌ను శరీరానికి అందించవచ్చు.

ముఖ్యంగా కొవ్వు ఎక్కువగా ఉండే చేపలు, గుడ్డు సొన, పుట్టగొడుగులు (Mushrooms) వంటి ఆహారాలను డైట్‌లో చేర్చుకోవడం ద్వారా విటమిన్ డి లభిస్తుంది. మూడవది, మార్కెట్లో లభించే బలవర్ధక ఆహారాలు (Fortified Foods) కూడా ఇందుకు అద్భుతంగా తోడ్పడతాయి. విటమిన్ డిని ప్రత్యేకంగా జోడించిన ఫోర్టిఫైడ్ పాలు, తృణధాన్యాలు (Fortified Cereals) తీసుకోవడం ద్వారా శరీరానికి కావలసిన రోజువారీ పోషకాల అవసరాన్ని సులభంగా తీర్చుకోవచ్చు.

ఇది కూడా చదవండి.. టీబీని సకాలంలో గుర్తించకపోతే ఏమౌతుంది..? 

 ఇది కూడా చదవండి.. ఎర్ర రక్త కణాలు, తెల్ల రక్త కణాల మధ్య వ్యత్యాసం..?

ఇది కూడా చదవండి.. తినే ఆహారానికి, అనారోగ్య సమస్యలకు లింక్ ఏంటి..? 

గమనిక: ఇది కేవలం సమాచారంగా మాత్రమే భావించండి.. ఈ సమాచారం ఆధారంగా ఆరోగ్య సమస్యలకు సంబంధించిన నిర్ణయాలు తీసుకోవద్దు. అందుకోసం వైద్య నిపుణులను సంప్రదించండి.