Healthy Sleeping tips : రాత్రి సమయంలో ఈ పనులు చేస్తే ప్రశాంత నిద్ర మీ సొంతం..!

సాక్షి లైఫ్ : రోజంతా ఆఫీసు పనుల ఒత్తిడి, ఇంటి పనుల హడావుడి, పిల్లల చదువుల బాధ్యతలు.. ఇలా కారణం ఏదైనా కావచ్చు, సాయంత్రానికి శరీరం నిస్సత్తువగా మారిపోతుంది. కండరాల బిగువు, కాళ్ల నొప్పులు, అలసిన కళ్లు, వీటన్నింటికీ తోడు మానసిక అలసట రాత్రి పూట నిద్రను సైతం దూరం చేస్తుంటాయి. ఇలాంటి తరుణంలో రాత్రి వేళల్లో పాటించే కొన్ని చిన్న చిన్న అలవాట్లు మీ శరీరానికి, మనసుకు అమితమైన ఉపశమనాన్ని అందిస్తాయి. అయితే, సాయంత్రం వేళల్లో శరీరాన్ని మరింత శ్రమకు గురిచేసే కఠినమైన వ్యాయామాలకు దూరంగా ఉండాలి. ప్రశాంతమైన నిద్ర కోసం నిపుణులు సూచిస్తున్న కొన్ని చక్కని చిట్కాలు ఇవే..

 ఇది కూడా చదవండి.. ఎర్ర రక్త కణాలు, తెల్ల రక్త కణాల మధ్య వ్యత్యాసం..?

ఇది కూడా చదవండి..ఒక వ్యక్తికి రోజుకి ఎన్ని కేలరీస్ అవసరం..? 

ఇది కూడా చదవండి..టిపికల్ ఫీవర్స్ అంటే ఏమిటి..? వాటి లక్షణాలు ఎలా ఉంటాయి..?

1. గోరువెచ్చని నీటి స్నానం..  

రాత్రి నిద్రపోవడానికి కనీసం రెండు గంటల ముందు గోరువెచ్చని నీటితో స్నానం చేయడం చాలా మంచిది. ఇది పగటిపూట ఏర్పడిన కండరాల బిగువును, అలసటను తగ్గిస్తుంది. అంతేకాకుండా, శరీర ఉష్ణోగ్రతను క్రమబద్ధీకరించి, ఒత్తిడి నుంచి ఉపశమనం కలిగిస్తుంది.

2. హెర్బల్ టీతో ఉపశమనం..  

రాత్రి వేళల్లో కెఫిన్ ఉండే కాఫీ, టీలకు దూరంగా ఉండాలి. వీటికి బదులుగా చామొమైల్ లేదా లావెండర్ వంటి హెర్బల్ టీలను తీసుకోవచ్చు. వీటిలో సహజంగానే శరీరాన్ని, మెదడును రిలాక్స్ చేసే గుణాలు ఉంటాయి. ఇది త్వరగా, ప్రశాంతంగా నిద్ర పట్టేలా చేస్తుంది.

3. ప్రాణాయామం, ధ్యానం..  

మంచి నిద్ర రావాలంటే మెదడులో ఆలోచనల వేగం తగ్గాలి. దీనికోసం పడక గదిలోకి వెళ్లే ముందు కాసేపు ప్రశాంతంగా కూర్చుని లోతైన శ్వాస తీసుకోవడం, లేదా కొద్ది నిమిషాల పాటు ధ్యానం చేయడం వల్ల మనసులోని ఆందోళనలు తొలగిపోయి ప్రశాంతత చేకూరుతుంది.

4. అరోమాథెరపీ..

మొక్కలు, పూల నుంచి తీసిన లావెండర్ వంటి సుగంధ తైలాలు (మానసిక స్థితిని మెరుగుపరుస్తాయి. స్నానం చేసే నీటిలో కొన్ని చుక్కలు వేసుకోవడం లేదా పడకగదిలో ఈ సుగంధాలు వెదజల్లేలా చూసుకోవడం వల్ల ఒత్తిడి మటుమాయమవుతుంది.

5. డిజిటల్ సన్‌సెట్.. అత్యంత ముఖ్యం..!

రాత్రి వేళల్లో మొబైల్ ఫోన్లు, లాప్‌టాప్‌లు, టీవీల స్క్రీన్ల నుంచి వచ్చే నీలి రంగు కాంతి (బ్లూ లైట్) నిద్ర చక్రాన్ని తీవ్రంగా దెబ్బతీస్తుంది. అందుకే నిద్రపోవడానికి కనీసం రెండు గంటల ముందే వీటికి స్వస్తి చెప్పాలి (డిజిటల్ సన్‌సెట్). అలాగే బెడ్‌రూమ్‌లో గాఢమైన వెలుతురు కాకుండా, కంటికి హాయినిచ్చే డిమ్ లైట్స్ ఉండేలా చూసుకోవాలి.

6. రాత్రి భోజనం తర్వాత చిన్న నడక..

రాత్రి భోజనం ముగిసిన తర్వాత ఇంటి టెర్రస్‌పై గానీ, తోటలో గానీ కాసేపు అలా నడవడం అలవాటు చేసుకోండి. స్వచ్ఛమైన గాలిని పీల్చడం, ప్రశాంతమైన వాతావరణాన్ని ఆస్వాదించడం వల్ల మనసు తేలికపడుతుంది.

7. తేలికపాటి స్ట్రెచెస్..

కండరాల నొప్పుల నుంచి ఉపశమనం పొందేందుకు భుజాలను గుండ్రంగా తిప్పడం , సీతాకోకచిలుక ఆసనం వంటి తేలికపాటి సాగతీతలు చేయవచ్చు. అయితే, ఈ స్ట్రెచెస్ చేసిన వెంటనే నిద్రపోకూడదు. వ్యాయామానికి, నిద్రకు మధ్య కనీసం 4 నుంచి 5 గంటల వ్యవధి ఉండాలని గుర్తుంచుకోండి.

శరీరానికి, మనసుకు రీఛార్జ్ లాంటి ఈ చిన్నపాటి మార్పులను మీ సాయంత్రపు దినచర్యలో భాగం చేసుకుంటే, నిద్రలేమి సమస్య దూరమవడమే కాకుండా మరుసటి రోజు ఉదయానికి సరికొత్త ఉత్సాహంతో అడుగు పెట్టవచ్చు..!

ఇది కూడా చదవండి..మీరు ఆరోగ్యంగా బరువు తగ్గాలంటే..? 

 ఇది కూడా చదవండి.. ఎక్కిళ్లు రావడానికి కారణాలు..? నివారణా చిట్కాలు.. 

ఇది కూడా చదవండి..సిండ్రోమ్ Xకు ప్రారంభ దశలో ఎలాంటి చికిత్సను అందిస్తారు..?

గమనిక: ఇది కేవలం సమాచారంగా మాత్రమే భావించండి.. ఈ సమాచారం ఆధారంగా ఆరోగ్య సమస్యలకు సంబంధించిన నిర్ణయాలు తీసుకోవద్దు. అందుకోసం వైద్య నిపుణులను సంప్రదించండి.