Stay Cool Without Compromising Health : వర్షాకాలంలో ఏసీ వాడేటప్పుడు పాటించాల్సిన జాగ్రత్తలు..

సాక్షి లైఫ్ : వానాకాలంలో ఉక్కపోత నుంచి ఉపశమనం పొందేందుకు చాలామంది ఏసీలను (AC) ఆశ్రయిస్తుంటారు. అయితే, ఈ వాతావరణంలో ఏసీని మరీ తక్కువ ఉష్ణోగ్రత వద్ద ఎక్కువసేపు వాడటం ఆరోగ్యానికి ఏమాత్రం శ్రేయస్కరం కాదని వైద్య నిపుణులు హెచ్చరిస్తున్నారు. వాతావరణంలో వచ్చే ఆకస్మిక మార్పుల వల్ల అనేక అనారోగ్య సమస్యలు తలెత్తే ప్రమాదం ఉంది. ఏసీ ఉష్ణోగ్రతను సరైన స్థాయిలో ఉంచడం, దాన్ని క్రమం తప్పకుండా శుభ్రం చేయడం వల్ల వర్షాకాలంలో వచ్చే ముప్పును చాలా వరకు తగ్గించుకోవచ్చని వైద్యనిపుణులు చెబుతున్నారు. 

ఇది కూడా చదవండి..Chest Pain : ఛాతీలో నొప్పా..? అది గుండెపోటా..? లేక పానిక్ అటాకా..? తేడా ఎలా గుర్తించాలి..?

ఇది కూడా చదవండి..కాలేయ ఆరోగ్యాన్ని నిర్లక్ష్యం చేస్తున్నారా..? మౌనంగా పెరుగుతున్న ఈ వ్యాధి గురించి తెలుసా..?

ఇది కూడా చదవండి..చిన్నారులలో అరుదైన జన్యుపరమైన వ్యాధుల నిర్ధారణకు సరికొత్త రక్త పరీక్ష.. 

అతి చల్లదనం వల్ల వచ్చే అనారోగ్య సమస్యలు..

1. వైరల్ ఇన్ఫెక్షన్ల ముప్పు..

వానాకాలంలో గాలిలో తేమ శాతం ఎక్కువగా ఉంటుంది. ఇది బ్యాక్టీరియా, వైరస్‌లు వృద్ధి చెందడానికి అనుకూలమైన వాతావరణం. బయట వేడిగా, ఉక్కపోతగా ఉన్న ప్రాంతం నుంచి హఠాత్తుగా చల్లగా ఉన్న ఏసీ గదిలోకి రావడం వల్ల శరీర ఉష్ణోగ్రతలో అకస్మాత్తుగా మార్పులు వస్తాయి. దీనివల్ల జలుబు, దగ్గు లేదా వైరల్ ఫీవర్ బారిన పడే అవకాశం పెరుగుతుంది.

2. గొంతులో గరగర, పొడిబారడం..

ఏసీని మరీ తక్కువ ఉష్ణోగ్రత వద్ద నిరంతరం వాడటం వల్ల గదిలోని గాలి పొడిబారుతుంది. దీని ప్రభావంతో ముక్కు, గొంతు లోపలి పొరలు పొడిబారిపోయి.. గొంతులో గరగర, మంట, వాయిస్ మారడం, దగ్గు వంటి సమస్యలు వేధిస్తాయి. ముఖ్యంగా టాన్సిల్స్, అలర్జీ ఉన్నవారు మరింత జాగ్రత్తగా ఉండాలి.

3. ఆస్తమా, అలర్జీ బాధితులకు ఇబ్బందులు..

వర్షాకాలంలో ఏసీ ఫిల్టర్లు, కూలింగ్ కాయిల్స్‌పై దుమ్ము, ధూళితో పాటు ఫంగస్ (fungus), ఇతర సూక్ష్మక్రిములు పేరుకుపోయే ప్రమాదం ఉంది. ఫిల్టర్లను ఎప్పటికప్పుడు శుభ్రం చేయకపోతే, ఏసీ ఆన్ చేసినప్పుడు ఆ క్రిములు గది అంతటా వ్యాపిస్తాయి. ఫలితంగా తుమ్ములు, ముక్కు కారడం, కళ్లు మండటం, శ్వాస తీసుకోవడంలో ఇబ్బంది, ఆస్తమా లక్షణాలు ఉధృతం కావడం వంటివి జరుగుతాయి.

వానాకాలంలో AC సరైన ఉష్ణోగ్రత ఎంత..?

ఆరోగ్య నిపుణుల సూచన ప్రకారం.. వర్షాకాలంలో ఏసీ ఉష్ణోగ్రతను 24°C నుంచి 26°C మధ్య ఉంచడం ఉత్తమం. ఇది శరీరానికి సౌకర్యవంతంగా ఉండటమే కాకుండా, బయటి వాతావరణానికి, లోపలి ఉష్ణోగ్రతకు మధ్య మరీ ఎక్కువ వ్యత్యాసం లేకుండా చేస్తుంది. దీనివల్ల చల్లదనం వల్ల కలిగే దుష్ప్రభావాలు తగ్గుతాయి.

వర్షాకాలంలో ఏసీ వాడేటప్పుడు పాటించాల్సిన జాగ్రత్తలు..  

ఉష్ణోగ్రత నియంత్రణ..ఏసీ టెంపరేచర్‌ను ఎల్లప్పుడూ 24°C - 26°C మధ్య ఉండేలా సెట్ చేసుకోండి. క్రమం తప్పకుండా సర్వీసింగ్.. ఫంగస్, దుమ్ము చేరకుండా ఏసీ ఫిల్టర్లు, కూలింగ్ కాయిల్స్‌ను ఎప్పటికప్పుడు శుభ్రం చేయించాలి.

ఆకస్మిక మార్పులు వద్దు..బయటి నుంచి చెమటతో వచ్చిన వెంటనే నేరుగా అతి చల్లగా ఉన్న ఏసీ గదిలోకి వెళ్లకూడదు. శరీర ఉష్ణోగ్రత సాధారణ స్థితికి వచ్చాకే ఏసీ ఆన్ చేసుకోవాలి. గాలి ఆడేలా చూడండి..గదిలో ఎప్పుడూ ఏసీ గాలే కాకుండా, స్వచ్ఛమైన గాలి ప్రవహించేలా రోజులో కొంతసేపు కిటికీలు, తలుపులు తీసి ఉంచాలి. ఏసీ గదిలో ఉన్నప్పుడు శరీరం డీహైడ్రేట్ కాకుండా ఉండేందుకు తగినన్ని నీళ్లు తాగుతూ ఉండాలి.

ఇది కూడా చదవండి..రోజూ బెల్లం తింటే బరువు పెరుగుతారా..?

ఇది కూడా చదవండి.. టీబీని సకాలంలో గుర్తించకపోతే ఏమౌతుంది..? 

 ఇది కూడా చదవండి.. ఎర్ర రక్త కణాలు, తెల్ల రక్త కణాల మధ్య వ్యత్యాసం..?

గమనిక: ఇది కేవలం సమాచారంగా మాత్రమే భావించండి.. ఈ సమాచారం ఆధారంగా ఆరోగ్య సమస్యలకు సంబంధించిన నిర్ణయాలు తీసుకోవద్దు. అందుకోసం వైద్య నిపుణులను సంప్రదించండి.