Chebulic Myrobalan Water : ఉదర సమస్యలకు చెక్ పెట్టే 'కరక్కాయ' నీళ్లు.. రోజూ తాగితే ఎన్ని లాభాలో.. 

సాక్షి లైఫ్ : ఆధునిక జీవనశైలి, వేళకాని వేళల్లో భోజనం, తీవ్రమైన ఒత్తిడి.. వెరసి నేటి కాలంలో ఉదర సంబంధిత సమస్యలు సర్వసాధారణంగా మారాయి. గ్యాస్, ఎసిడిటీ, మలబద్ధకం, అజీర్తి వంటి ఇబ్బందులు పడని వారు అరుదు. అయితే, ఎలాంటి దుష్ప్రభావాలు లేకుండా సహజసిద్ధంగా ఈ సమస్యల నుంచి బయటపడే మార్గాలను ఆయుర్వేదం సూచిస్తోంది. అందులో అద్భుతమైన ఔషధం 'హరీతకి' దీనినే కరక్కాయ అని కూడా అంటారు. శతాబ్దాలుగా ఆయుర్వేద వైద్యంలో జీర్ణవ్యవస్థను బలోపేతం చేయడానికి, దేహ శుద్ధికి దీనిని విరివిగా ఉపయోగిస్తున్నారు. ఈ హరీతకి నీటిని క్రమం తప్పకుండా తీసుకుంటే పొట్ట సమస్యలకు శాశ్వతంగా చెక్ పెట్టవచ్చు.

ఇది కూడా చదవండి..చిన్నారులలో అరుదైన జన్యుపరమైన వ్యాధుల నిర్ధారణకు సరికొత్త రక్త పరీక్ష.. 

ఇది కూడా చదవండి..Don’t Ignore Fever : సాధారణ జ్వరమే కదా అని నిర్లక్ష్యం చేస్తే ప్రాణాలకే ముప్పు..! ఈ 5 లక్షణాలపై అవగాహన అవసరం.. 

ఇది కూడా చదవండి..రోజూ బెల్లం తింటే బరువు పెరుగుతారా..? 

ఎలా తయారు చేసుకోవాలి..? ఎలా తాగాలి..?

ఒక గ్లాసు గోరువెచ్చని నీటిలో ఒక చిన్న కరక్కాయ లేదా అర టీస్పూన్ కరక్కాయ పొడిని వేసి రాత్రంతా నానబెట్టాలి. ఉదయాన్నే నిద్రలేవగానే పరగడుపున ఈ నీటిని తాగితే అద్భుతమైన ఫలితాలు ఉంటాయి. అయితే, మోతాదు మించకుండా చూసుకోవాలి.

హరీతకి జలంతో కలిగే 5 ప్రధాన ఆరోగ్య ప్రయోజనాలు..

1. జీర్ణవ్యవస్థ పనితీరు మెరుగు.. 

కరక్కాయ నీరు పొట్టలోని జీర్ణ ఎంజైమ్‌లను చురుకుగా మారుస్తుంది. తద్వారా మనం తీసుకున్న ఆహారం త్వరగా, సాఫీగా విచ్ఛిన్నమై జీర్ణమవుతుంది. భోజనం తర్వాత కడుపు ఉబ్బరంగా అనిపించడం, అజీర్తి, కడుపు బరువుగా ఉండటం వంటి ఇబ్బందులతో బాధపడేవారికి ఇది దివ్యౌషధంలా పనిచేస్తుంది. పేగుల ఆరోగ్యాన్ని సైతం ఇది మెరుగుపరుస్తుంది.

2. మలబద్ధకానికి విరుగుడు..

ఆయుర్వేద నిపుణులు హరీతకిని సహజ సిద్ధమైన విరేచనకారిగా చెబుతారు. ఉదయాన్నే మలవిసర్జన సాఫీగా సాగక ఇబ్బంది పడేవారికి ఇది చక్కటి ఉపశమనం ఇస్తుంది. ఇది మలాన్ని మృదువుగా మార్చి విసర్జనను సులభతరం చేయడమే కాకుండా, పేగుల్లో దీర్ఘకాలంగా పేరుకుపోయిన వ్యర్థాలను సున్నితంగా బయటకు పంపుతుంది.

3.డిటాక్సిఫికేషన్.. 

శరీరంలో పేరుకుపోయిన వ్యర్థాలను, విషతుల్యాలను బయటకు పంపడంలో హరీతకి నీరు చురుగ్గా పనిచేస్తుంది. ఇది ముఖ్యంగా కాలేయం, పేగులను శుభ్రపరుస్తుంది. అంతర్గతంగా దేహం శుద్ధి కావడం వల్ల దాని ప్రభావం చర్మంపై కూడా కనిపిస్తుంది. చర్మం మరింత కాంతివంతంగా, ఆరోగ్యంగా మారుతుంది.

4. ఎసిడిటీ, గ్యాస్ నుంచి ఉపశమనం.. 

కడుపులో ఆమ్లాల స్థాయిని సమతుల్యం చేయడంలో హరీతకికి సాటిలేదు. మసాలా, కారంగా ఉండే ఆహారాలు తిన్న తర్వాత వచ్చే ఛాతీ మంట, పుల్లటి త్రేన్పులు, గ్యాస్ వంటి వాటికి ఇది సహజ నివారణగా పనిచేస్తుంది. యాసిడ్ రిఫ్లక్స్ సమస్య ఉన్నవారికి ఇది చాలా ప్రయోజనకరం.

5. రోగనిరోధక శక్తి వృద్ధి..

కరక్కాయలో పుష్కలంగా ఉండే యాంటీ ఆక్సిడెంట్లు మన శరీరంలోని ఇమ్యూనిటీని అమాంతం పెంచుతాయి. వాతావరణంలో ఉండే బ్యాక్టీరియా, వైరస్‌ల బారిన పడకుండా దేహాన్ని రక్షిస్తాయి. దీనిని తరచుగా తీసుకోవడం వల్ల వాతావరణ మార్పుల వల్ల వచ్చే సీజనల్ వ్యాధుల ముప్పు తగ్గి, శరీరం రోజంతా ఉల్లాసంగా, చురుకుగా ఉంటుంది.

ఈ జాగ్రత్తలు తప్పనిసరి..

కరక్కాయ నీరు ఆరోగ్యానికి ఎంతో మేలు చేసేదైనప్పటికీ, కొందరు దీనిని వాడే ముందు జాగ్రత్తలు తీసుకోవాలి..

గర్భిణులు ఈ నీటిని తాగకూడదు. లోబీపీ సమస్య ఉన్నవారు దీనికి దూరంగా ఉండాలి. తీవ్రమైన నీరసం లేదా బలహీనతతో బాధపడేవారు వాడకూడదు. వైద్యుల సలహా లేదా ఆయుర్వేద నిపుణుల సూచనల మేరకు మాత్రమే వాడాలి.

ఇది కూడా చదవండి..కాలేయ ఆరోగ్యాన్ని నిర్లక్ష్యం చేస్తున్నారా..? మౌనంగా పెరుగుతున్న ఈ వ్యాధి గురించి తెలుసా..?

ఇది కూడా చదవండి..Chest Pain : ఛాతీలో నొప్పా..? అది గుండెపోటా..? లేక పానిక్ అటాకా..? తేడా ఎలా గుర్తించాలి..?

ఇది కూడా చదవండి.. టీబీని సకాలంలో గుర్తించకపోతే ఏమౌతుంది..? 

 ఇది కూడా చదవండి.. ఎర్ర రక్త కణాలు, తెల్ల రక్త కణాల మధ్య వ్యత్యాసం..?

గమనిక: ఇది కేవలం సమాచారంగా మాత్రమే భావించండి.. ఈ సమాచారం ఆధారంగా ఆరోగ్య సమస్యలకు సంబంధించిన నిర్ణయాలు తీసుకోవద్దు. అందుకోసం వైద్య నిపుణులను సంప్రదించండి.