Breastfeeding Mothers : బాలింతలు ఏం తినాలి..? ఏం తినకూడదు..? నిపుణుల సూచనలివే..

సాక్షి లైఫ్ : బిడ్డకు జన్మనివ్వడం ప్రతి మహిళ జీవితంలో అత్యంత మధురమైన ఘట్టం. ప్రసవం తర్వాత తల్లి శరీరం త్వరగా కోలుకోవడంతో పాటు, నవజాత శిశువుకు అవసరమైన పూర్తి పోషకాలను తన పాల ద్వారా అందించాల్సిన బాధ్యత ఆమెపైనే ఉంటుంది. ఈ సమయంలో బాలింతలు తీసుకునే ఆహారం కేవలం ఆమె ఆరోగ్యాన్నే కాకుండా, ఉత్పత్తి అయ్యే పాల నాణ్యతను కూడా నిర్ణయిస్తుంది.

అయితే, గర్భంతో ఉన్నప్పుడు పెరిగిన బరువును ప్రసవం తర్వాత వెంటనే తగ్గించుకోవాలనే ఆరాటంతో చాలామంది తల్లులు డైటింగ్ చేస్తుంటారు. కానీ, ఇది తల్లికి, బిడ్డకు ఇద్దరికీ నష్టం చేకూరుస్తుందని నిపుణులు హెచ్చరిస్తున్నారు. పాలిచ్చే తల్లులకు సాధారణ రోజుల కంటే ఎక్కువ క్యాలరీలు, ప్రోటీన్లు, క్యాల్షియం, ఐరన్, విటమిన్లు అవసరం. కాబట్టి ఆహారం మానేయకుండా, సమతుల్యమైన పోషకాహారం తీసుకోవడం ద్వారా పాల ఉత్పత్తిని పెంచుకుంటూనే, నెమ్మదిగా బరువు కూడా తగ్గొచ్చు. పాలిచ్చే తల్లుల డైట్ ఎలా ఉండాలో ఇప్పుడు తెలుసుకుందాం.

బాలింతల డైట్ ప్లాన్.. ఇవి తప్పక తినాలి..!

1. మాంసకృత్తులు ( Proteins) అత్యవసరం..

ప్రసవం తర్వాత శరీరం తిరిగి కోలుకోవడానికి, కణజాలాల మరమ్మతుకు, పాలు సమృద్ధిగా పడటానికి ప్రోటీన్లు చాలా అవసరం. మీ రోజువారీ ఆహారంలో పప్పులు, పన్నీర్, పాలు, పెరుగు, గుడ్లు, చికెన్, చేపలు, రాజ్మా, సోయా వంటివి తప్పకుండా ఉండేలా చూసుకోవాలి.

2. తగినంత శక్తి (calories)..

పాలిచ్చే సమయంలో తల్లి శరీరానికి అదనపు శక్తి అవసరం. కాబట్టి క్యాలరీలు తక్కువగా తీసుకునే క్రాష్ డైట్‌లు చేయకూడదు. సమయానికి తగినంత ఆరోగ్యకరమైన ఆహారం తీసుకోవాలి.

3. క్యాల్షియం, విటమిన్ డి..

 తల్లి ఎముకలు దృఢంగా ఉండటానికి, బిడ్డ ఎదుగుదలకు క్యాల్షియం ముఖ్యం. పాలు, పెరుగు, పన్నీర్, నువ్వులు, రాగులు ఎక్కువగా తీసుకోవాలి. ఉదయం పూట లేత ఎండలో కాసేపు నిలబడటం వల్ల శరీరానికి అవసరమైన విటమిన్-డి అందుతుంది.

4. ఇనుము (Iron)..

 ప్రసవ సమయంలో జరిగిన రక్తస్రావం వల్ల ఏర్పడే రక్తహీనతను నివారించడానికి ఐరన్ ఎక్కువగా ఉండే ఆహారం తీసుకోవాలి. పాలకూర తదితర ఆకుకూరలు, బీట్‌రూట్, బెల్లం, ఎండుద్రాక్ష, దానిమ్మ, పప్పుదినుసులు విరివిగా తీసుకోవాలి.

5. మేలు చేసే కొవ్వులు (Healthy Fats)..

 వాల్‌నట్స్, బాదం, అవిసె గింజలు (Flaxseeds), చియా సీడ్స్, ఒమేగా-3 ఫ్యాటీ యాసిడ్లు అధికంగా ఉండే చేపలు.. తల్లి మానసిక ఆరోగ్యానికి, శిశువు మెదడు వికాసానికి చాలా మేలు చేస్తాయి.

6. హైడ్రేషన్..

 పాలిచ్చే సమయంలో శరీరానికి నీటి అవసరం బాగా పెరుగుతుంది. రోజుకు కనీసం 2.5 నుంచి 3 లీటర్ల నీరు తాగాలి. కొబ్బరి నీళ్లు, మజ్జిగ, తాజా పండ్ల రసాలు, సూప్స్ వంటి ద్రవ పదార్థాలు తీసుకోవడం మంచిది.

7. తాజా పండ్లు, కూరగాయలు..

 సీజనల్‌గా దొరికే పండ్లు, ఆకుపచ్చని కూరగాయల్లో విటమిన్లు, మినరల్స్, పీచుపదార్థం (fiber) మెండుగా ఉంటాయి. ఇవి బాలింతల్లో సాధారణంగా వచ్చే మలబద్ధకాన్ని నివారించి, రోగనిరోధక శక్తిని పెంచుతాయి.

ఇది కూడా చదవండి..చిన్నారులలో అరుదైన జన్యుపరమైన వ్యాధుల నిర్ధారణకు సరికొత్త రక్త పరీక్ష.. 

ఇది కూడా చదవండి..రోజూ బెల్లం తింటే బరువు పెరుగుతారా..? 

ఇది కూడా చదవండి.. మీరు ఆరోగ్యంగా బరువు తగ్గాలంటే..? 

ఇది కూడా చదవండి..టిపికల్ ఫీవర్స్ అంటే ఏమిటి..? వాటి లక్షణాలు ఎలా ఉంటాయి..? 

8. ముడి ధాన్యాలు (Whole Grains)..

ఓట్స్, బ్రౌన్ రైస్, చిరుధాన్యాలు (millets), గోధుమలు వంటివి మీ డైట్‌లో చేర్చుకోండి. ఇవి శరీరానికి రోజంతా అవసరమైన శక్తిని ఇవ్వడంతో పాటు జీర్ణక్రియను సాఫీగా ఉంచుతాయి.

వీటికి ఎంత దూరంగా ఉంటే అంత మంచిది..

జంక్ ఫుడ్ వద్దు..

 నూనెలో ఎక్కువగా వేయించిన పదార్థాలు, స్వీట్లు, బేకింగ్ ఐటమ్స్, ప్యాకేజ్డ్ స్నాక్స్, కూల్‌డ్రింక్స్ వంటి వాటికి పూర్తిగా దూరంగా ఉండాలి. ఇవి అకారణంగా బరువును పెంచడమే కాకుండా పోషకాల కొరతను సృష్టిస్తాయి.

బరువు తగ్గింపులో తొందరొద్దు..

 పాలిచ్చే సమయంలో వేగంగా బరువు తగ్గాలని ఎప్పుడూ ప్రయత్నించకండి. మంచి పోషకాహారం తీసుకుంటూ, వైద్యుల సలహాతో నడక లాంటి తేలికపాటి వ్యాయామాలు చేయడం ద్వారా క్రమంగా, సురక్షితంగా బరువు తగ్గవచ్చు.

ఇది కూడా చదవండి..Cholesterol : కొలెస్ట్రాల్‌ను అదుపులో ఉంచే అద్భుతమైన అలవాట్లు.. మందులతో పనే లేదు..!

ఇది కూడా చదవండి..Pimples : ముఖంపై పదే పదే మొటిమలు వేధిస్తున్నాయా..? ఐతే లోపం చర్మంలో కాదు, శరీరంలోనే..!

ఇది కూడా చదవండి..అధిక బరువు తగ్గాలంటే రోజుకి ఎన్ని క్యాలరీలు బర్న్ అవ్వాలి..? 

ఇది కూడా చదవండి.. టీబీని సకాలంలో గుర్తించకపోతే ఏమౌతుంది..? 

 ఇది కూడా చదవండి.. ఎర్ర రక్త కణాలు, తెల్ల రక్త కణాల మధ్య వ్యత్యాసం..?

గమనిక: ఇది కేవలం సమాచారంగా మాత్రమే భావించండి.. ఈ సమాచారం ఆధారంగా ఆరోగ్య సమస్యలకు సంబంధించిన నిర్ణయాలు తీసుకోవద్దు. అందుకోసం వైద్య నిపుణులను సంప్రదించండి.