Cholesterol : కొలెస్ట్రాల్ను అదుపులో ఉంచే అద్భుతమైన అలవాట్లు.. మందులతో పనే లేదు..!
సాక్షి లైఫ్ : ఉరుకుల పరుగుల జీవితం, అనారోగ్యకరమైన ఆహారపు అలవాట్లు, శారీరక శ్రమ లేకపోవడం వల్ల నేడు చాలామంది ‘హై కొలెస్ట్రాల్’ (High Cholesterol) బారిన పడుతున్నారు. కొలెస్ట్రాల్ అనగానే ఖరీదైన మందులు వాడాలని కంగారు పడుతుంటారు. కానీ, మన దైనందిన జీవితంలో కొన్ని చిన్నపాటి మార్పులు చేసుకుంటే ఈ సమస్యను సులభంగా అదుపులో ఉంచుకోవచ్చు.
ఇది కూడా చదవండి..కిడ్నీలు పనిచేయడం లేదని ఎలా తెలుసుకోవాలి..?
ఇది కూడా చదవండి.. ఎలాంటి ఆసనాలు, ముద్రలు వేస్తే జ్ఞాపకశక్తి పెరుగుతుంది..?
ఇది కూడా చదవండి..టిపికల్ ఫీవర్స్ అంటే ఏమిటి..? వాటి లక్షణాలు ఎలా ఉంటాయి..?
అసలు కొలెస్ట్రాల్ అంటే ఏమిటి..? ఎందుకు అదుపులో ఉంచుకోవాలి..?
శరీరంలో కణాలు, హార్మోన్ల ఉత్పత్తికి కొలెస్ట్రాల్ అనే కొవ్వు పదార్థం ఎంతో అవసరం. అయితే, ఇందులో ఉండే చెడు కొలెస్ట్రాల్ (LDL) మోతాదుకు మించి పెరిగితే రక్తనాళాల్లో అడ్డంకులు (బ్లాకేజ్) ఏర్పడి గుండెపోటు, స్ట్రోక్ వంటి తీవ్రమైన ముప్పులు ఎదురవుతాయి. అదే మంచి కొలెస్ట్రాల్ (HDL) ఉంటే శరీరంలోని అదనపు కొవ్వును బయటకు పంపేందుకు సహాయపడుతుంది. చెడు కొలెస్ట్రాల్ను తగ్గించుకోవడానికి రోజువారీ జీవితంలో అలవర్చుకోవాల్సిన ముఖ్యమైన అలవాట్లు ఏమిటో ఇప్పుడు తెలుసుకుందాం..
1. ఆరోగ్యకరమైన అల్పాహారం..
ఉదయం బ్రేక్ఫాస్ట్ను ఎప్పుడూ మానేయకూడదు. ఓట్స్, తృణధాన్యాలు, పండ్లు, మొలకలు, పెరుగు, డ్రై ఫ్రూట్స్ వంటి ఫైబర్, ప్రోటీన్లు అధికంగా ఉండే ఆహారం తీసుకోవాలి. ఇవి కడుపు నిండిన భావనను ఇచ్చి చెడు కొలెస్ట్రాల్ను కరిగించడంలో సహాయపడతాయి.
2. రోజుకు అరగంట వ్యాయామం..
నడక, జాగింగ్, సైక్లింగ్, యోగా లేదా తేలికపాటి వ్యాయామాలు రోజూ కనీసం 30 నిమిషాల పాటు చేయాలి. శరీరానికి క్రమం తప్పకుండా శ్రమ కల్పించడం వల్ల చెడు కొలెస్ట్రాల్ తగ్గి, మంచి కొలెస్ట్రాల్ పెరుగుతుంది.
3. ఫైబర్ (fiber) ఎక్కువగా ఉండాలి..
ఆకుకూరలు, తాజా పండ్లు, తృణధాన్యాలు, పప్పులు, రాజ్మా, శనగలు వంటి వాటిలో ఫైబర్ పుష్కలంగా ఉంటుంది. ఇవి జీర్ణవ్యవస్థను మెరుగుపరచడమే కాకుండా శరీరంలో పేరుకుపోయిన అదనపు కొవ్వును తొలగిస్తాయి.
4. నూనె, జంక్ ఫుడ్కు దూరం..
ఫాస్ట్ ఫుడ్, ప్యాక్ చేసిన స్నాక్స్, బేకరీ పదార్థాలు, ఎక్కువగా నూనెలో వేయించిన వంటకాల్లో 'ట్రాన్స్ ఫ్యాట్', 'శాచురేటెడ్ ఫ్యాట్' మోతాదులు ప్రమాదకర స్థాయిలో ఉంటాయి. ఇవి గుండె ఆరోగ్యానికి తీవ్ర నష్టం కలిగిస్తాయి కాబట్టి వీటికి ఎంత దూరంగా ఉంటే అంత మంచిది.
5. కంటినిండా నిద్ర..
రోజూ కనీసం 7 నుంచి 8 గంటల పాటు ప్రశాంతంగా నిద్రపోవడం చాలా అవసరం. సరైన నిద్ర శరీర జీవక్రియలను (metabolism) సమతుల్యం చేసి, గుండెను ఆరోగ్యంగా ఉంచుతుంది.
6. ఒత్తిడికి చెక్ పెట్టండి..
నిరంతరం ఒత్తిడి, ఆందోళనలకు గురయ్యే వారు ఎక్కువగా జంక్ ఫుడ్ తింటుంటారు, వ్యాయామానికి దూరమవుతారు. దీన్ని నివారించడానికి యోగా, ధ్యానం (yoga, meditation), దీర్ఘంగా శ్వాస తీసుకోవడం అలవర్చుకోవాలి. లేదా మీకు నచ్చిన హాబీలపై దృష్టి పెట్టాలి.
7. క్రమం తప్పకుండా ఆరోగ్య పరీక్షలు..
సాధారణంగా హై కొలెస్ట్రాల్ ప్రారంభ దశలో ఎలాంటి లక్షణాలూ బయటపడవు. కాబట్టి ఎప్పటికప్పుడు 'లిపిడ్ ప్రొఫైల్ టెస్ట్' (Lipid Profile Test) చేయించుకోవడం ద్వారా రక్తంలో కొలెస్ట్రాల్ స్థాయిలను గమనిస్తూ, ముందుజాగ్రత్త చర్యలు తీసుకోవచ్చు. జీవనశైలిలో ఈ చిన్నపాటి ఆరోగ్యకరమైన మార్పులు చేసుకోవడం ద్వారా, చెడు కొలెస్ట్రాల్ను అదుపులో ఉంచుకోవడమే కాకుండా మీ గుండెను దీర్ఘకాలం పాటు పదిలంగా కాపాడుకోవచ్చు.
ఇది కూడా చదవండి.. మీరు ఆరోగ్యంగా బరువు తగ్గాలంటే..?
ఇది కూడా చదవండి.. చల్లని వాతావరణం వల్ల సైనస్ సమస్యలు పెరుగుతాయా..?
ఇది కూడా చదవండి..ఆరోగ్యప్రయోజనాలు పొందాలంటే సలాడ్ ను ఏ టైమ్ లో తినాలి..?
ఇది కూడా చదవండి..లవ్ హార్మోన్ అంటే ఏమిటి..?
గమనిక: ఇది కేవలం సమాచారంగా మాత్రమే భావించండి.. ఈ సమాచారం ఆధారంగా ఆరోగ్య సమస్యలకు సంబంధించిన నిర్ణయాలు తీసుకోవద్దు. అందుకోసం వైద్య నిపుణులను సంప్రదించండి.
