Health Supplements : హెల్త్ సప్లిమెంట్లు వాడుతున్నారా..? ఫ్యాషన్ కోసం తింటే కిడ్నీలు, లివర్ ఫెయిల్ కావచ్చు..!

సాక్షి లైఫ్ : శరీరం సక్రమంగా పనిచేయడానికి విటమిన్లు, ఖనిజ లవణాలు అత్యంత అవసరం. అయితే నేటి ఆధునిక కాలంలో మారుతున్న ఆహారపు అలవాట్ల వల్ల చాలామందిలో చిన్న వయసులోనే ఐరన్, విటమిన్ డి, కాల్షియం లోపాలు బయటపడుతున్నాయి. ఈ లోపాలను సరిచేసుకోవడానికి చాలామంది డాక్టర్ల కంటే ఎక్కువగా సోషల్ మీడియాలోని ‘ఫిట్‌నెస్ ఇన్‌ఫ్లుయెన్సర్ల’ మాటలను నమ్ముతున్నారు. జిమ్‌లకు వెళ్లే యువత, ఫ్యాషన్‌గా మారిపోయిన మల్టీ విటమిన్ ట్యాబ్లెట్లను విచ్చలవిడిగా వాడేస్తున్నారు.

ఇది కూడా చదవండి..Don’t Ignore Fever : సాధారణ జ్వరమే కదా అని నిర్లక్ష్యం చేస్తే ప్రాణాలకే ముప్పు..! ఈ 5 లక్షణాలపై అవగాహన అవసరం.. 

ఇది కూడా చదవండి..రోజూ బెల్లం తింటే బరువు పెరుగుతారా..? 

ఇది కూడా చదవండి..Chest Pain : ఛాతీలో నొప్పా..? అది గుండెపోటా..? లేక పానిక్ అటాకా..? తేడా ఎలా గుర్తించాలి..?

అయితే, అవసరం లేకుండా సొంత నిర్ణయాలతో సప్లిమెంట్లు వాడటం వల్ల లాభం కంటే నష్టమే ఎక్కువని మెడికల్ రిపోర్టులు హెచ్చరిస్తున్నాయి. ఇవి ఆహారానికి ప్రత్యామ్నాయం కావు, కేవలం లోపాలను పూరించడానికి మాత్రమేనని గుర్తించాలి. సరైన అవగాహన లేకుండా వీటిని మింగేస్తే కిడ్నీలు, కాలేయం (liver) శాశ్వతంగా దెబ్బతినే ప్రమాదం ఉంది.

సొంత వైద్యంతో పొంచి ఉన్న ముప్పు..!

 రక్త పరీక్షలు లేకుండా దీర్ఘకాలం పాటు సప్లిమెంట్లు వాడటం ఏమాత్రం సురక్షితం కాదు. మనం వాడే ఇతర మందులతో ఈ సప్లిమెంట్లు వికటించే (Drug Interaction) అవకాశం ఉంది. ఉదాహరణకు.. విటమిన్-కె రక్తాన్ని పలచబరిచే మందుల పనితీరును అడ్డుకుంటుంది. అలాగే కొన్ని రకాల మినరల్స్, మనం వేసుకునే యాంటీబయాటిక్స్ శరీరం గ్రహించకుండా చేస్తాయి.

మనకు కావలసిన అన్ని రకాల పోషకాలు పండ్లు, ఆకుకూరలు, తృణధాన్యాలు, పాలు, గుడ్ల వంటి సమతుల్య ఆహారం ద్వారా సహజంగానే లభిస్తాయి. కాబట్టి మాత్రలపై ఆధారపడటం తగ్గించాలి.

ఏయే సప్లిమెంట్లతో ఎలాంటి సమస్యలు వస్తాయో చూద్దాం.. 

1. కాల్షియం మాత్రల అతి వినియోగం..  

ఎముకలు, దంతాల బలానికి కాల్షియం అవసరమే. కానీ, ఆహారం ద్వారా శరీరానికి సరిపడా కాల్షియం అందుతున్నప్పుడు కూడా అదనంగా హై డోస్ మాత్రలు వేసుకుంటే అవి కిడ్నీల్లో రాళ్లుగా (Kidney Stones) మారే ప్రమాదం ఉంది. దీనివల్ల మలబద్ధకం, కడుపు ఉబ్బరం వంటి సమస్యలు వస్తాయి. రక్తంలో కాల్షియం స్థాయిలు మితిమీరితే (Hypercalcemia) కండరాల బలహీనత, వాంతులు, గుండె లయ తప్పడం వంటి తీవ్రమైన ఇబ్బందులు ఎదురవుతాయి.

2. విటమిన్ డి మోతాదు మించితే ప్రమాదం.. 

ప్రస్తుతం ప్రపంచవ్యాప్తంగా చాలామంది విటమిన్ డి లోపంతో బాధపడుతున్నారు. ఇది శరీరంలో కాల్షియం గ్రహణశక్తికి అవసరమే అయినప్పటికీ, దీన్ని పరిమితికి మించి తీసుకుంటే వికటfamily వస్తుంది. శరీరంలో విటమిన్ డి ఎక్కువైతే కాల్షియం స్థాయిలు అసాధారణంగా పెరిగిపోయి, కిడ్నీలు శాశ్వతంగా పాడయ్యే (Kidney Damage) అవకాశం ఉంది. దీనివల్ల తరచూ మూత్రవిసర్జన కావడం, మానసిక గందరగోళం వంటి లక్షణాలు కనిపిస్తాయి. ఎలాంటి విటమిన్ అయినా శరీరానికి తగిన మోతాదులోనే ఉండాలి. అమృతం అయినా హద్దు దాటితే విషమే అవుతుంది. సప్లిమెంట్లు వాడే ముందు బ్లడ్ టెస్ట్ తప్పనిసరి.

3. ఐరన్ ( iron) సప్లిమెంట్ల దుష్ప్రభావాలు..  

రక్తహీనత (Anemia) ఉన్నవారికి వైద్యులు ఐరన్ సప్లిమెంట్లను సిఫార్సు చేస్తారు. ఇది శరీరంలో హిమోగ్లోబిన్ పెంచడానికి సహాయపడుతుంది. అయితే, ఐరన్ లోపం లేనివారు కూడా వీటిని తీసుకుంటే తీవ్రమైన దుష్ప్రభావాలు ఉంటాయి.

హై డోస్ ఐరన్ వల్ల కడుపునొప్పి, మలబద్ధకం, వికారం, వాంతులు కావడం, మల విసర్జన నల్లగా అవ్వడం వంటివి జరుగుతాయి.

సుదీర్ఘకాలం పాటు అవసరానికి మించి ఐరన్ తీసుకుంటే, ఆ అదనపు ఇనుము లివర్, గుండె వంటి ఇతర అంతర్గత అవయవాలలో పేరుకుపోయి, అవి ఫెయిల్ కావడానికి దారితీస్తుంది. ఫిట్‌నెస్ లేదా అందం పేరుతో మార్కెట్లో దొరికే ప్రొటీన్ పౌడర్లు, మల్టీ విటమిన్ క్యాప్సూళ్లను అడ్డగోలుగా వాడకండి. మీ శరీరానికి ఏ పోషకం తక్కువైందో తెలుసుకోవడానికి ముందుగా ఫ్యామిలీ డాక్టర్‌ను సంప్రదించి, వారి ప్రిస్క్రిప్షన్ ప్రకారమే తగిన మోతాదులో మాత్రమే మందులు వాడటం శ్రేయస్కరం.

ఇది కూడా చదవండి..కాలేయ ఆరోగ్యాన్ని నిర్లక్ష్యం చేస్తున్నారా..? మౌనంగా పెరుగుతున్న ఈ వ్యాధి గురించి తెలుసా..?

ఇది కూడా చదవండి..చిన్నారులలో అరుదైన జన్యుపరమైన వ్యాధుల నిర్ధారణకు సరికొత్త రక్త పరీక్ష.. 

ఇది కూడా చదవండి.. టీబీని సకాలంలో గుర్తించకపోతే ఏమౌతుంది..? 

 ఇది కూడా చదవండి.. ఎర్ర రక్త కణాలు, తెల్ల రక్త కణాల మధ్య వ్యత్యాసం..?

గమనిక: ఇది కేవలం సమాచారంగా మాత్రమే భావించండి.. ఈ సమాచారం ఆధారంగా ఆరోగ్య సమస్యలకు సంబంధించిన నిర్ణయాలు తీసుకోవద్దు. అందుకోసం వైద్య నిపుణులను సంప్రదించండి.