Dehydration : డీహైడ్రేషన్.. ప్రాణాంతకం కాకముందే మేల్కోండి..!

సాక్షి లైఫ్ : శరీరంలో నీటి శాతం తగ్గడాన్ని అంటే డీహైడ్రేషన్ ను కేవలం సాధారణ దాహంగా భావించి నిర్లక్ష్యం చేస్తున్నారా..? అయితే మీరు ప్రమాదంలో పడినట్లే..! ఇది కేవలం గొంతు ఎండిపోయే సమస్య మాత్రమే కాదు.. శరీరంలోని కీలక అవయవాలైన గుండె, మూత్రపిండాలు, మెదడు పనితీరును అస్తవ్యస్తం చేసే తీవ్రమైన ముప్పు. ఎండల తీవ్రత, అధికంగా చెమట పట్టడం, వాంతులు, విరేచనాలు లేదా రోజంతా తగినంత నీరు తాగకపోవడం వల్ల క్రమంగా డీహైడ్రేషన్ బారిన పడే ప్రమాదం ఉంది.

ఇది కూడా చదవండి..కిడ్నీలు పనిచేయడం లేదని ఎలా తెలుసుకోవాలి..?

ఇది కూడా చదవండి.. ఎలాంటి ఆసనాలు, ముద్రలు వేస్తే జ్ఞాపకశక్తి పెరుగుతుంది..?

ఇది కూడా చదవండి..టిపికల్ ఫీవర్స్ అంటే ఏమిటి..? వాటి లక్షణాలు ఎలా ఉంటాయి..? 

ఆరోగ్య నిపుణుల హెచ్చరికల ప్రకారం.. శరీరంలో నీటి కొరత ఏర్పడినప్పుడు రక్త పరిమాణం (Blood volume) పడిపోతుంది. దీంతో శరీర భాగాలన్నింటికీ రక్తాన్ని సరఫరా చేయడానికి గుండె సాధారణం కంటే ఎక్కువగా శ్రమించాల్సి వస్తుంది. డీహైడ్రేషన్‌ను ఏమాత్రం తక్కువ అంచనా వేసినా ఈ 5 తీవ్రమైన ఆరోగ్య సమస్యలు ఎదుర్కోవాల్సి వస్తుందని గ్రహించాలి.

డీహైడ్రేషన్ తో పొంచి ఉన్న 5 ప్రధాన సమస్యలు..

1. గుండెపై అదనపు భారం..

శరీరంలో తగినంత ద్రవాలు లేనప్పుడు రక్త పరిమాణం తగ్గుతుంది. ఫలితంగా రక్తప్రసరణను సక్రమంగా ఉంచేందుకు గుండె పంపింగ్ వేగం పెరుగుతుంది. ఇది హృదయ స్పందన రేటును (Heart rate) అసాధారణంగా పెంచి, రక్తపోటులో మార్పులకు దారితీస్తుంది. ఇప్పటికే గుండె సంబంధిత సమస్యలు ఉన్నవారికి ఇది మరింత ప్రమాదకరం.

2. కిడ్నీలు దెబ్బతినే ప్రమాదం..

శరీరంలోని వ్యర్థాలను, విషపదార్థాలను వడపోసి బయటకు పంపే కీలక బాధ్యత కిడ్నీలదే. డీహైడ్రేషన్ వల్ల కిడ్నీలకు తగినంత నీరు అందక వాటి పనితీరు మందగిస్తుంది. ఈ పరిస్థితి దీర్ఘకాలం కొనసాగితే మూత్రపిండాల్లో రాళ్లు ఏర్పడటం, కిడ్నీలు శాశ్వతంగా దెబ్బతినడం వంటి తీవ్ర పరిణామాలు ఎదురవుతాయి.

3. లో బీపీ, తలతిరగడం..

రక్త పరిమాణం తగ్గడం వల్ల రక్తపోటు (Low BP) అకస్మాత్తుగా పడిపోతుంది. దీనివల్ల తీవ్రమైన నీరసం, తలతిరగడం, ఒక్కోసారి స్పృహ కోల్పోవడం వంటివి జరుగుతాయి. ముఖ్యంగా వృద్ధులు, ఎండలో శారీరక శ్రమ చేసేవారు ఈ ముప్పు పట్ల అత్యంత అప్రమత్తంగా ఉండాలి.

4. వడదెబ్బకు గురయ్యే అవకాశాలు..

శరీర ఉష్ణోగ్రతను క్రమబద్ధీకరించడంలో నీరు కీలక పాత్ర పోషిస్తుంది. డీహైడ్రేషన్ కు గురైనప్పుడు శరీరంలో చెమట పట్టే ప్రక్రియ ఆగిపోతుంది. దీంతో శరీరం చల్లబడలేక, లోపలి ఉష్ణోగ్రత విపరీతంగా పెరిగిపోయి వడదెబ్బ (Heatstroke) తగిలే ప్రమాదం ఉంది.

5. మెదడు పనితీరులో మందకొడితనం..

నీటి కొరత కేవలం శారీరక అవయవాలనే కాదు, మెదడును కూడా తీవ్రంగా ప్రభావితం చేస్తుంది. తలనొప్పి, ఏకాగ్రత లోపించడం, చిరాకు, జ్ఞాపకశక్తి మందగించడం వంటి లక్షణాలు కనిపిస్తాయి. నిరంతరం డీహైడ్రేషన్ తో బాధపడేవారిలో మానసిక సామర్థ్యం గణనీయంగా పడిపోతుంది.

డీహైడ్రేషన్‌ను అడ్డుకునే సులభమైన మార్గాలు..

నీరు తప్పనిసరి: ప్రతిరోజూ కనీసం 2.5 నుంచి 3 లీటర్ల నీరు తప్పనిసరిగా తాగాలి. ఎండలో తిరుగుతున్నప్పుడు లేదా వ్యాయామం చేసేటప్పుడు ద్రవాల వినియోగాన్ని మరింత పెంచాలి.
కేవలం నీళ్లే కాకుండా కొబ్బరి నీళ్లు, మజ్జిగ, నిమ్మరసం, నీటి శాతం ఎక్కువగా ఉండే తాజా పండ్లను రోజువారీ ఆహారంలో చేర్చుకోవాలి. కెఫిన్ ఎక్కువగా ఉండే కాఫీలు, టీలు, అలాగే కృత్రిమ చక్కెరలు ఉండే శీతల పానియాలు (Cool drinks) డీహైడ్రేషన్ ను పెంచుతాయి. వాటికి వీలైనంత దూరంగా ఉండాలి. దాహం వేసినప్పుడే కాకుండా, పనిలో ఉన్నప్పుడు కూడా కొద్దికొద్దిగా నీళ్లు తాగడం అలవాటు చేసుకోవాలి.

ఇది కూడా చదవండి.. మీరు ఆరోగ్యంగా బరువు తగ్గాలంటే..? 

ఇది కూడా చదవండి.. చల్లని వాతావరణం వల్ల సైనస్ సమస్యలు పెరుగుతాయా..? 

ఇది కూడా చదవండి..ఆరోగ్యప్రయోజనాలు పొందాలంటే సలాడ్ ను ఏ టైమ్ లో తినాలి..?

 ఇది కూడా చదవండి..లవ్ హార్మోన్ అంటే ఏమిటి..?

గమనిక: ఇది కేవలం సమాచారంగా మాత్రమే భావించండి.. ఈ సమాచారం ఆధారంగా ఆరోగ్య సమస్యలకు సంబంధించిన నిర్ణయాలు తీసుకోవద్దు. అందుకోసం వైద్య నిపుణులను సంప్రదించండి.