Oral health care : టూత్‌బ్రష్‌ను ఎంతకాలానికి మార్చాలి..? దంతవైద్యులు సూచిస్తున్న సరైన కాలపరిమితి ఏమిటి..? 

సాక్షి లైఫ్ : మన నిత్య జీవితంలో నోటి ఆరోగ్యం (oral hygiene) అనేది సంపూర్ణ ఆరోగ్యానికి తొలి అడుగు. చాలామంది దంతాల సంరక్షణ కోసం రకరకాల టూత్‌పేస్టులను మారుస్తుంటారు కానీ, వాడే టూత్‌బ్రష్ విషయంలో మాత్రం పెద్దగా శ్రద్ధ పెట్టరు. కొందరైతే బ్రష్ పై ఉండే బ్రిజిల్స్ పూర్తిగా వంగిపోయి, అరిగిపోయే వరకు నెలల తరబడి దాన్నే వాడుతుంటారు. అయితే, ఇలా ఒకే బ్రష్‌ను సుదీర్ఘకాలం ఉపయోగించడం వల్ల దంతాలు శుభ్రపడకపోగా.. చిగుళ్ల నష్టంతో పాటు పలు నోటి ఆరోగ్య సమస్యలు కొనితెచ్చుకున్నట్లేనని దంతవైద్యులు హెచ్చరిస్తున్నారు.

ఇది కూడా చదవండి.. క్షయవ్యాధి ఏయే అవయవాలపై ప్రభావం చూపుతుంది..?

ఇది కూడా చదవండి..ఆరోగ్యప్రయోజనాలు పొందాలంటే సలాడ్ ను ఏ టైమ్ లో తినాలి..?

ఇది కూడా చదవండి..టిపికల్ ఫీవర్స్ అంటే ఏమిటి..? వాటి లక్షణాలు ఎలా ఉంటాయి..? 

టూత్‌బ్రష్ అనేది కేవలం పళ్లు తోముకునే సాధనం మాత్రమే కాదు.. అది మన నోటి క్షేమాన్ని నిర్ణయించే ఒక ముఖ్యమైన భాగం. మరి ఒక బ్రష్‌ను ఎంతకాలం వాడాలి..? సకాలంలో మార్చకపోతే వచ్చే నష్టాలేంటో ఇప్పుడు తెలుసుకుందాం.

టూత్‌బ్రష్‌ను ఎప్పుడు మార్చాలి..?

దంత వైద్య నిపుణుల అభిప్రాయం ప్రకారం.. ఒక టూత్‌బ్రష్‌ను గరిష్టంగా 3 నుండి 4 నెలల వరకు మాత్రమే ఉపయోగించాలి.

ఈ కాలపరిమితి దాటిన తర్వాత బ్రష్ బ్రిజిల్స్ తమ పట్టును కోల్పోయి అరిగిపోవడం ప్రారంభమవుతుంది.

ఒకవేళ మీ వాడకం వల్ల మూడు నెలల కంటే ముందే బ్రష్ పీచు వంకర తిరిగిపోతే, దాన్ని అంతకంటే ముందే మార్చేయడం మంచిది.

పాత బ్రష్‌ను వాడటం వల్ల కలిగే అనర్థాలు..

క్రిముల ఆవాసంగా మారడం..

 బ్రష్ పాతబడే కొద్దీ దాని లోపలి భాగాల్లో కంటికి కనిపించని బ్యాక్టీరియా, ప్రమాదకర క్రిములు పేరుకుపోతాయి. ఇది నోటి ఇన్ఫెక్షన్లకు దారితీస్తుంది.

అసంపూర్ణ శుభ్రత: అరిగిపోయిన వెంట్రుకలు దంతాల సందుల్లోకి సరిగ్గా వెళ్లలేవు. దీనివల్ల పళ్ల మధ్య పేరుకుపోయిన మురికి, ఆహార కణాలు అలాగే ఉండిపోయి పచ్చటి పాచి ఏర్పడుతుంది.

చిగుళ్ల సమస్యలు: గట్టిపడిన లేదా పాడైపోయిన పాత బ్రష్ బ్రిజిల్స్ వల్ల చిగుళ్లు నలిగిపోతాయి. దీనివల్ల చిగుళ్ల వాపు, నొప్పి, రక్తం కారడం (bleeding gums) వంటి సమస్యలు తలెత్తుతాయి.

నోటి దుర్వాసన..

 బ్రష్‌పై పేరుకున్న బ్యాక్టీరియాను మనం గమనించకుండా రోజూ నోట్లో పెట్టడం వల్ల శ్వాసలో తీవ్రమైన దుర్వాసన మొదలవుతుంది.

ఈ పరిస్థితుల్లో వెంటనే మార్చేయండి..!

ఇన్ఫెక్షన్లు లేదా అనారోగ్యం తర్వాత.. మీకు ఏదైనా జ్వరం, దగ్గు, గొంతు నొప్పి లేదా వైరల్ ఇన్ఫెక్షన్లు వచ్చి తగ్గిన తర్వాత.. మీరు వాడుతున్న టూత్‌బ్రష్‌ను వెంటనే మార్చేయాలి. ఎందుకంటే కోలుకున్న తర్వాత కూడా పాత బ్రష్‌పై ఆ వైరస్ లేదా బ్యాక్టీరియా సజీవంగా ఉండే అవకాశం ఉంది. దానివల్ల మళ్లీ అనారోగ్యం బారిన పడే ప్రమాదం ఉంటుంది. బ్రష్ బ్రిజిల్స్ పక్కకు వంగిపోయి, అరిగిపోయినట్లు కనిపిస్తే.. బ్రష్ పైభాగం నుంచి ఎలాంటి దుర్వాసన వస్తున్నట్లు అనిపించినా ఆలస్యం చేయకూడదు.

అందమైన చిరునవ్వు, ఆరోగ్యకరమైన దంతాల కోసం ప్రతి 3 నుంచి 4 నెలలకు ఒకసారి క్రమం తప్పకుండా టూత్‌బ్రష్‌ను మార్చడం అలవాటు చేసుకోండి. చిన్నపాటి జాగ్రత్తలతోనే పెద్ద దంత సమస్యలను దూరం పెట్టవచ్చని వైద్యులు సూచిస్తున్నారు.

ఇది కూడా చదవండి..Latest study : పిల్లిని పెంచుకుంటే స్కిజోఫ్రెనియా ముప్పు రెట్టింపు..! 

ఇది కూడా చదవండి..ఒత్తిడిని ఫుడ్ చేంజెస్ చేయడం ద్వారా తగ్గించవచ్చా..? 

ఇది కూడా చదవండి..అధిక బరువు తగ్గాలంటే రోజుకి ఎన్ని క్యాలరీలు బర్న్ అవ్వాలి..? 

గమనిక: ఇది కేవలం సమాచారంగా మాత్రమే భావించండి.. ఈ సమాచారం ఆధారంగా ఆరోగ్య సమస్యలకు సంబంధించిన నిర్ణయాలు తీసుకోవద్దు. అందుకోసం వైద్య నిపుణులను సంప్రదించండి..