30ఏళ్ల తర్వాతస్త్రీలు తప్పనిసరిగా చేయించుకోవాల్సిన ఐదు వైద్య పరీక్షలు ఏమిటి..?   

సాక్షి లైఫ్ : వయసు పెరిగే కొద్దీ శరీరంలో ముఖ్యంగా స్త్రీలలో అనేక మార్పులు సంభవిస్తాయి. 30 సంవత్సరాల వయస్సు తర్వాత మహిళలు తమ ఆరోగ్యం గురించి మరింత శ్రద్ధ పెట్టాల్సి ఉంది.ముప్పై ఏళ్ల వయస్సులో హార్మోన్ల మార్పులు, ఎముకలు బలహీన పడటంతోపాటు కొన్ని తీవ్రమైన వ్యాధుల ప్రమాదం పెరుగుతుంది.

అటువంటి పరిస్థితిలో క్రమం తప్పకుండా మహిళలు హెల్త్ చెకప్ చేయించుకోవడం చాలా ముఖ్యం. 30 ఏళ్ల తర్వాత ప్రతి స్త్రీ తప్పనిసరిగా చేయించుకోవాల్సిన 5 ముఖ్యమైన పరీక్షల (30 ఏళ్లు పైబడిన మహిళలకు ఆరోగ్య పరీక్షలు) గురించి ఇక్కడ మాట్లాడుకుందాం..

మూత్రపిండాల వ్యాధిని నిర్ధారించడంలో మూత్రంలో ప్రోటీన్ పాత్ర..?

రక్తహీనత ఎలాంటివాళ్లలో ఎక్కువ..?

 నారింజ తినడంవల్ల ఏమైనా దుష్ప్రభావాలున్నాయా..?
 

రక్తపోటు- కొలెస్ట్రాల్ టెస్ట్..  

30 సంవత్సరాల వయస్సు తర్వాత, గుండె సంబంధిత సమస్యల ప్రమాదం పెరుగుతుంది. అధిక రక్తపోటు , కొలెస్ట్రాల్ సమస్యలు సాధారణంగా ఎటువంటి లక్షణాలను చూపించకుండానే శరీరానికి హాని కలిగిస్తాయి. అందువల్ల, రక్తపోటు, కొలెస్ట్రాల్‌ను క్రమం తప్పకుండా తనిఖీ చేసుకోవడం చాలా అవసరమని వైద్యనిపుణులు వెల్లడిస్తున్నారు. ఈ పరీక్ష గుండె జబ్బులు, స్ట్రోక్ వంటి తీవ్రమైన వ్యాధుల ప్రమాదాన్ని తగ్గించడంలో సహాయపడుతుంది.

పాప్ స్మియర్ టెస్ట్.. 

మహిళల్లో గర్భాశయ క్యాన్సర్‌ను గుర్తించడానికి పాప్ స్మియర్ టెస్ట్  చేస్తారు. ఈ పరీక్షను 30 సంవత్సరాల వయస్సు తర్వాత క్రమం తప్పకుండా చేయించుకోవాలి, ముఖ్యంగా కుటుంబ సభ్యులలో క్యాన్సర్ ఉంటే అలాంటివారు తప్పనిసరిగా చేయించుకోవాలని డాక్టర్లు సూచిస్తున్నారు. పాప్ స్మియర్ టెస్ట్ గర్భాశయ క్యాన్సర్ ప్రారంభ లక్షణాలను గుర్తించి, సకాలంలో చికిత్స అందించడానికి వీలవుతుంది.

మామోగ్రఫీ (రొమ్ము క్యాన్సర్ స్క్రీనింగ్).. 

మహిళల్లో సర్వసాధారణంగా వచ్చే క్యాన్సర్లలో రొమ్ము క్యాన్సర్ ఒకటి. 30 ఏళ్ల తర్వాత, మహిళలు క్రమం తప్పకుండా మామోగ్రఫీ పరీక్షలు చేయించుకోవాలి. ఈ పరీక్ష రొమ్ము క్యాన్సర్ ప్రారంభ లక్షణాలను గుర్తించడంలో సహాయపడుతుంది. కుటుంబ చరిత్రలో రొమ్ము క్యాన్సర్ ఉంటే, ఈ పరీక్ష ఖచ్చితంగా చేయించుకోవాలి.

బోన్ డెన్సిటీ టెస్ట్..  

30 సంవత్సరాల వయస్సు తర్వాత, మహిళల్లో ఎముక సాంద్రత తగ్గడం ప్రారంభమవుతుంది, ఇది బోలు ఎముకల వ్యాధి ప్రమాదాన్ని పెంచుతుంది. ఎముక సాంద్రత పరీక్ష ఎముకల బలం, సాంద్రతను కొలుస్తుంది. కాల్షియం లోపం ఉన్న లేదా జీవనశైలిలో శారీరక శ్రమ తక్కువగా ఉన్న మహిళలకు ఈ పరీక్ష చాలా అవసరం.

థైరాయిడ్ ఫంక్షన్ టెస్ట్..  
 
ఈ రోజుల్లో థైరాయిడ్ సమస్యలు సర్వసాధారణం అయిపోయాయి, ముఖ్యంగా మహిళల్లో థైరాయిడ్ హార్మోన్ల అసమతుల్యత శరీర జీవక్రియను ప్రభావితం చేస్తుంది. దీని వల్ల బరువు పెరగడం, అలసట వంటి సమస్యలు వస్తాయి. థైరాయిడ్ సంబంధిత సమస్యలను సకాలంలో గుర్తించడానికి 30 సంవత్సరాల వయస్సు తర్వాత థైరాయిడ్ ఫంక్షన్ టెస్ట్ చేయించుకోవాలని వైద్యనిపుణులు చెబుతున్నారు.

ఇది కూడా చదవండి..వైద్యుని సలహా లేకుండా గర్భిణీలు పెయిన్ కిల్లర్స్ ఎందుకు వాడకూడదు..? 

ఇది కూడా చదవండి..HbA1c స్థాయి 10 కంటే ఎక్కువగా ఉంటే ఏమౌతుంది..?

ఇది కూడా చదవండి..ప్రాసెస్ చేసిన ఆహారం తినడం గుండె ఆరోగ్యాన్ని ఎలా ప్రభావితం చేస్తుంది..?

ఇది కూడా చదవండి..ఏమేం విటిమిన్స్ ద్వారా ఎలాంటి ఆరోగ్య ప్రయోజనాలున్నాయి..?

గమనిక: ఇది కేవలం సమాచారంగా మాత్రమే భావించండి.. ఈ సమాచారం ఆధారంగా ఆరోగ్య సమస్యలకు సంబంధించిన నిర్ణయాలు తీసుకోవద్దు. అందుకోసం వైద్య నిపుణులను సంప్రదించండి.