Hearing Loss on the Rise Among Young Adults : యువతలోనూ పెరుగుతున్న వినికిడి లోపం.. కారణాలు ఏమిటంటే..?

సాక్షి లైఫ్ : ఎదుటివారు చెప్పిన మాటను పదేపదే మళ్ళీ చెప్పమని అడుగుతున్నారా..? టీవీ వాల్యూమ్‌ను ఇంట్లో మిగతా వారి కంటే ఎక్కువగా పెడుతున్నారా..? ఫోన్‌లో మాట్లాడేటప్పుడు అవతలి వ్యక్తి మాటలు అస్పష్టంగా అనిపించి స్పీకర్ ఆన్ చేస్తున్నారా..? అయితే మీరు వినికిడి సమస్యల బారిన పడుతున్నారని అర్థం.. ఒకప్పుడు కేవలం వృద్ధాప్యంలోనే కనిపించే ఈ వినికిడి లోపం (Hearing Loss), ప్రస్తుత రోజుల్లో 30 ఏళ్లలోపు యువతలోనూ వేగంగా పెరుగుతుండటం ఆందోళన కలిగిస్తోంది. ప్రపంచ ఆరోగ్య సంస్థ (WHO) నివేదికల ప్రకారం.. ప్రపంచవ్యాప్తంగా లక్షలాది మంది ఈ సమస్యతో సతమతమవుతున్నారు. మన రోజువారీ జీవనశైలిలో చేసే కొన్ని చిన్న చిన్న పొరపాట్లే ఈ ముప్పును కొనితెస్తున్నాయని నిపుణులు హెచ్చరిస్తున్నారు.

ఇది కూడా చదవండి.. మీరు ఆరోగ్యంగా బరువు తగ్గాలంటే..? 

ఇది కూడా చదవండి.. గుండె నొప్పిని ఎలా గుర్తించవచ్చు..?

ఇది కూడా చదవండి..ఒత్తిడి, ఆందోళనను తగ్గించడానికి బెస్ట్ ఫుడ్ ఏది..?

వినికిడి లోపానికి దారితీసే ప్రధాన కారణాలు..?

వయసు పెరగడం సహజ కారణమే అయినప్పటికీ, చిన్న వయసులోనే వినికిడి తగ్గడానికి పలు అంశాలు కారణమవుతున్నాయి. హెడ్‌ఫోన్స్, ఇయర్‌ఫోన్స్ మితిమీరిన వాడకం..నిరంతరం చెవుల్లో ఇయర్‌ఫోన్స్ పెట్టుకుని, ఎక్కువ వాల్యూమ్‌తో పాటలు వినడం, సినిమాలు చూడటం వల్ల చెవిలోని సున్నితమైన నరాలు దెబ్బతింటున్నాయి. ధ్వని కాలుష్యం..ఫ్యాక్టరీలు, రద్దీగా ఉండే ట్రాఫిక్, పెద్ద శబ్దాలు వచ్చే వాతావరణంలో ఎక్కువ సమయం గడపడం. ఆరోగ్య సమస్యలు..మధుమేహం (diabetes), అధిక రక్తపోటు (hypertension) వంటి దీర్ఘకాలిక వ్యాధులు చెవుల్లోని రక్తప్రసరణను దెబ్బతీసి వినికిడి లోపానికి కారణమవుతున్నాయి.

ఇన్ఫెక్షన్లు, ఇతర అలవాట్లు..

చెవి ఇన్ఫెక్షన్లను నిర్లక్ష్యం చేయడం, చెవి పొరపై ఒత్తిడి పడటం, అగ్గిపుల్లలు లేదా పిన్నులు పెట్టి చెవులను శుభ్రం చేయడానికి ప్రయత్నించడం వల్ల ప్రమాదం పెరుగుతోంది.

ప్రాథమిక లక్షణాలను గుర్తించండిలా..

ఈ సమస్య ఉన్నవారు మొదట్లో ఎదుటి వ్యక్తి మెల్లగా మాట్లాడుతున్నారని భ్రమపడతారు. రద్దీగా ఉండే ప్రదేశాలలో లేదా గ్రూప్ సంభాషణల్లో మాటలు అస్పష్టంగా వినపడటం. చెవిలో నిరంతరం రింగుమని లేదా ఈల వేసినట్లు శబ్దం రావడం (Tinnitus). దూరంగా ఉండే వస్తువుల ధ్వనులను సరిగ్గా గ్రహించలేకపోవడం.

చెవుల రక్షణకు నిపుణులు సూచిస్తున్న సులువైన మార్గాలు..

1. 60/60 నియమాన్ని పాటించండి..

ఇయర్‌ఫోన్స్ వాడేటప్పుడు వాల్యూమ్‌ను ఎప్పుడూ 60 శాతం కంటే తక్కువగా ఉంచుకోవాలి. అలాగే నిరంతరాయంగా 60 నిమిషాల కంటే ఎక్కువ సమయం వాటిని ఉపయోగించకూడదు. మధ్యమధ్యలో చెవులకు విశ్రాంతి ఇవ్వాలి.

2. పోషకాహారం ముఖ్యం.. 

చెవుల నరాలు ఆరోగ్యంగా ఉండటానికి, రక్తప్రసరణ సజావుగా సాగడానికి విటమిన్ బి12, ఫోలేట్, మెగ్నీషియం, ఒమేగా-3 ఫ్యాటీ యాసిడ్లు, జింక్ మరియు యాంటీఆక్సిడెంట్లు అవసరం. ఇందుకోసం ఆకుకూరలు, తాజా పండ్లు, నట్స్, చేపలను డైట్‌లో చేర్చుకోవాలి.

3. సొంత వైద్యం వద్దు..

చెవుల్లో బడ్స్, పిన్నులు పెట్టి క్లీన్ చేయకూడదు. దీనివల్ల ఇన్‌ఫెక్షన్లు రావడమే కాకుండా చెవి పొర చిట్లిపోయే ప్రమాదం ఉంది. చెవిలో ఏవైనా సమస్యలు ఉంటే వెంటనే ఈఎన్‌టీ (ENT) నిపుణుడిని సంప్రదించాలి. వినికిడి లోపాన్ని కేవలం వృద్ధాప్య సమస్యగా భావించి నిర్లక్ష్యం చేయవద్దు. సకాలంలో గుర్తిస్తే ఇన్ఫెక్షన్లకు చికిత్స చేయడం ద్వారా, అవసరమైతే ఆధునిక హియరింగ్ ఎయిడ్స్ (modern hearing aids) సహాయంతో వినికిడిని తిరిగి మెరుగుపరుచుకోవచ్చు. షుగర్, బీపీ ఉన్నవారు వాటిని ఎప్పటికప్పుడు నియంత్రణలో ఉంచుకోవడం చాలా ముఖ్యం.

ఇది కూడా చదవండి..టిపికల్ ఫీవర్స్ అంటే ఏమిటి..? వాటి లక్షణాలు ఎలా ఉంటాయి..? 

ఇది కూడా చదవండి..చిన్నారులలో అరుదైన జన్యుపరమైన వ్యాధుల నిర్ధారణకు సరికొత్త రక్త పరీక్ష.. 

ఇది కూడా చదవండి..  మైక్రోసైటిక్ అనీమియా అంటే ఏమిటి..?  

గమనిక: ఇది కేవలం సమాచారంగా మాత్రమే భావించండి.. ఈ సమాచారం ఆధారంగా ఆరోగ్య సమస్యలకు సంబంధించిన నిర్ణయాలు తీసుకోవద్దు. అందుకోసం వైద్య నిపుణులను సంప్రదించండి.