Monsoon Food Alert : వర్షాకాలంలో ఈ 5 రకాల కూరగాయలతో జాగ్రత్త.. లేదంటే ముప్పే..!

సాక్షి లైఫ్ : వర్షాకాలంలో వాతావరణంలో ఉండే తేమ వల్ల బ్యాక్టీరియా, ఫంగస్ వంటి సూక్ష్మజీవులు వేగంగా వృద్ధి చెందుతాయి. ఇలాంటి సమయంలో మనం కొనుగోలు చేసే కూరగాయల విషయంలో ఏమాత్రం అజాగ్రత్తగా ఉన్నా ఇన్ఫెక్షన్ల బారిన పడక తప్పదు. వానాకాలంలో కూరగాయలు కొనేటప్పుడు, వాటిని వండేటప్పుడు ఎలాంటి జాగ్రత్తలు తీసుకోవాలో చూద్దాం..

ఇది కూడా చదవండి.. ప్రీమెన్‌ స్ట్రువల్ సిండ్రోమ్ వచ్చేముందు లక్షణాలు ఎలా ఉంటాయి..?

ఇది కూడా చదవండి..వేగంగా బరువు తగ్గించే ఓట్జెంపిక్ డ్రింక్ ట్రెండ్.. డైటీషియన్లు ఏమంటున్నారంటే..? 

ఇది కూడా చదవండి.. గుండె నొప్పిని ఎలా గుర్తించవచ్చు..?

ఈ 5 రకాల కూరగాయల విషయంలో అప్రమత్తత అవసరం..

1. పచ్చిగా తినే సలాడ్స్ (Raw Veggies)..

క్యారెట్, కీరదోస, టమాటా, ఉల్లిపాయ, బీట్‌రూట్ వంటివి ఆరోగ్యానికి మంచివే. కానీ ఈ సీజన్‌లో వీటిని పచ్చిగా తినే ముందు చాలా శుభ్రంగా కడగాలి. ముఖ్యంగా బయట దొరికే కట్ చేసిన సలాడ్లకు, స్ట్రీట్ ఫుడ్స్‌కు ఈ కాలంలో ఎంత దూరంగా ఉంటే అంత మంచిది. 

2. ఆకుకూరలు..

పాలకూర, మెంతికూర, క్యాబేజీ లాంటి ఆకుకూరల విషయంలో వర్షాకాలంలో చాలా జాగ్రత్తగా ఉండాలి. వీటి ఆకుల మధ్యలో మట్టి, తేమతో పాటు చిన్నచిన్న పురుగులు చేరే ప్రమాదం ఉంది. వీటిని సరిగ్గా కడగకుండా వండుకుంటే ఫుడ్ పాయిజనింగ్, కడుపులో ఇన్ఫెక్షన్లు, విరేచనాలు వంటి సమస్యలు వస్తాయి.

3. ముందుగా కట్ చేసిన కూరగాయలు..

మార్కెట్లో లేదా సూపర్ మార్కెట్లలో ముందుగానే కట్ చేసి ప్యాక్ చేసిన కూరగాయలను (Pre-cut vegetables) అస్సలు కొనకండి. వాతావరణంలోని తేమ వల్ల వాటిపై బ్యాక్టీరియా త్వరగా చేరుతుంది. తాజా కూరగాయలు ఇంటికి తెచ్చుకుని, వండుకునే ముందే కట్ చేసుకోవడం సురక్షితం.

4. అపరిశుభ్ర వాతావరణంలో అమ్మేవి..

రోడ్డు పక్కన, బురద లేదా మురుగు నీరు నిలిచిన ప్రాంతాల్లో, బహిరంగంగా ఎలాంటి కవర్ లేకుండా అమ్మే కూరగాయలను కొనుగోలు చేయవద్దు. అవి పైకి తాజాగా కనిపించినా లోపల కలుషితమై ఉండే అవకాశం ఉంటుంది.

5. కుళ్లిపోయిన, వాడిపోయిన కూరగాయలు..

కూరగాయల నుంచి దుర్వాసన వచ్చినా, ఫంగస్ చేరినట్లు కనిపించినా, పురుగులు పట్టిన ఆనవాళ్లు ఉన్నా వాటిని తీసుకోకండి. వీటిని తింటే తీవ్రమైన జీర్ణకోశ సమస్యలు తప్పవు.

వానాకాలంలో ఎలాంటి కూరగాయలు సురక్షితం మరి..?

ఈ సీజన్‌లో మందపాటి చర్మం ఉండే సొరకాయ, బీరకాయ, గుమ్మడికాయ, బూడిద గుమ్మడి, పర్వాల్ వంటి కూరగాయలు ఎంచుకోవడం ఉత్తమం. వీటి చర్మం మందంగా ఉండటం వల్ల బయటి వాతావరణంలోని సూక్ష్మజీవులు లోపలి భాగాన్ని కలుషితం చేయలేవు. అయితే వీటిని కూడా శుభ్రంగా కడిగి, బాగా ఉడికించిన తర్వాతే తినాలి.

పాటించాల్సిన ముఖ్యమైన జాగ్రత్తలు..  

ఎల్లప్పుడూ తాజా, సీజనల్ కూరగాయలనే ఎంచుకోండి. కూరగాయలను ప్రవహించే నీటి (Running water) కింద శుభ్రంగా కడగాలి. గోరువెచ్చని నీటిలో కొద్దిగా ఉప్పు వేసి కడగడం మరీ మంచిది. ఆకుకూరలను వండే ముందు అందులోని ప్రతి ఆకును విడివిడిగా కడగడం మర్చిపోవద్దు. ఈ సీజన్‌లో కూరగాయలను పచ్చిగా తినడం కంటే బాగా ఉడికించి (Well-cooked) తినడమే ఉత్తమం. ఫ్రిజ్‌లో రోజుల తరబడి నిల్వ ఉంచిన కూరగాయలను వాడకండి.

చదవండి..చెడు కొలెస్ట్రాల్ ను నియంత్రించే పనస పండు.. 

ఇది కూడా చదవండి..మైక్రోసైటిక్ అనీమియా అంటే ఏమిటి..?  

ఇది కూడా చదవండి.. క్షయవ్యాధి ఏయే అవయవాలపై ప్రభావం చూపుతుంది..? 

గమనిక: ఇది కేవలం సమాచారంగా మాత్రమే భావించండి.. ఈ సమాచారం ఆధారంగా ఆరోగ్య సమస్యలకు సంబంధించిన నిర్ణయాలు తీసుకోవద్దు. అందుకోసం వైద్య నిపుణులను సంప్రదించండి.