Myth or Fact : బరువు తగ్గడానికి గోరువెచ్చని నీరు, తేనె.. ప్రచారమా.. వాస్తవమా..?

సాక్షి లైఫ్ : బరువు తగ్గడానికి చాలామంది రకరకాల ఇంటి చిట్కాలను పాటిస్తున్నారు. వాటిలో అత్యంత ప్రాచుర్యం పొందింది 'గోరువెచ్చని నీటిలో తేనె కలుపుకుని తాగడం'. ఉదయం పరగడుపున ఈ మిశ్రమాన్ని తాగితే శరీరంలోని కొవ్వు ఇట్టే కరిగిపోతుందని సోషల్ మీడియాలో, హెల్త్ బ్లాగుల్లో విపరీతంగా ప్రచారం జరుగుతోంది. దీంతో ఎలాంటి శాస్త్రీయ అవగాహన లేకుండానే చాలామంది దీనిని తమ దినచర్యలో భాగంగా చేసుకుంటున్నారు. అయితే, తేనె , గోరువెచ్చని నీటి మిశ్రమం బరువు తగ్గడానికి నిజంగానే పనిచేస్తుందా..? లేక ఇదొక అపోహ మాత్రమేనా..? ఈ విషయంలో సైన్స్ ఏం చెబుతోందో ఇప్పుడు తెలుసుకుందాం..

ఇది కూడా చదవండి..విటమిన్ సి లోపించినప్పుడు కనిపించే ముఖ్య లక్షణాలు ఇవే.. 

ఇది కూడా చదవండి..రాత్రి 9 గంటల తర్వాత డిన్నర్ చేయడం వల్ల కలిగే నష్టాలు ఇవే..

ఇది కూడా చదవండి..అధిక బరువు తగ్గాలంటే రోజుకి ఎన్ని క్యాలరీలు బర్న్ అవ్వాలి..? 

శాస్త్రీయ ఆధారాలు ఉన్నాయా..?

కేవలం గోరువెచ్చని నీటిలో తేనె కలుపుకుని తాగడం వల్ల వేగంగా బరువు తగ్గుతారని చెప్పడానికి ఇప్పటివరకు ఎలాంటి బలమైన శాస్త్రీయ ఆధారాలు లేవు. బరువు తగ్గడం అనేది ప్రధానంగా 'క్యాలరీ లోటు' (Calorie Deficit) పై ఆధారపడి ఉంటుంది. అంటే, మనం ఆహారం ద్వారా తీసుకునే కేలరీల కంటే, శారీరక శ్రమ ద్వారా ఖర్చు చేసే కేలరీలు ఎక్కువగా ఉండాలి.

తేనెలోనూ కేలరీలు.. 

చాలామంది తేనె అనగానే అది పూర్తిగా షుగర్ ఫ్రీ అని భ్రమపడతారు. కానీ అది నిజం కాదు. తేనెలో సహజ సిద్ధమైన చక్కెరలు ఉంటాయి. సుమారు ఒక టేబుల్ స్పూన్ తేనెలో 60 నుంచి 65 కేలరీలు ఉంటాయి. బరువు తగ్గుతామనే ఉద్దేశ్యంతో దీన్ని మోతాదుకు మించి తీసుకుంటే, బరువు తగ్గకపోగా పెరిగే ప్రమాదం కూడా ఉంటుంది.

మరి గోరువెచ్చని నీరు ఎలా సహాయపడుతుంది..?

గోరువెచ్చని నీరు తాగడం వల్ల శరీరం హైడ్రేటెడ్‌గా ఉంటుంది. అంతేకాకుండా, కడుపు నిండిన భావన (Satiety) కలిగిస్తుంది. దీనివల్ల పదే పదే అనవసరమైన చిరుతిళ్లు తినాలనే కోరిక తగ్గుతుంది. అలాగని, గోరువెచ్చని నీరు దానంతట అదే శరీరంలోని కొవ్వును కరిగించేస్తుందనుకోవడం పొరపాటు.

చక్కెరకు బదులు వాడొచ్చా..?

శుద్ధి చేసిన తెల్ల చక్కెర (Refined Sugar) కు బదులుగా తేనెను మితంగా వాడటం ఆరోగ్యానికి మంచిదే. ఒక ప్రత్యామ్నాయంగా ఇది ఉత్తమమైన ఎంపిక. కానీ, కేవలం తేనె వాడినంత మాత్రాన అపరిమితంగా బరువు తగ్గుతారని అర్థం కాదు.

ఆరోగ్యంగా బరువు తగ్గాలంటే ఏం చేయాలి..?

బరువు తగ్గడానికి కేవలం ఒక పానీయంపై ఆధారపడకుండా పలు నియమాలు పాటించాలి. పోషకాలున్న, కేలరీలు నియంత్రించిన సమతుల్య ఆహారం తీసుకోవాలి. ప్రతిరోజూ కనీసం 30 నుంచి 45 నిమిషాల పాటు వ్యాయామం చేయాలి. ఆహారంలో తగినంత ప్రోటీన్ ఉండేలా చూసుకోవాలి. రోజుకు 7 నుంచి 8 గంటల పాటు ప్రశాంతమైన నిద్ర అవసరం. ఒత్తిడిని (Stress) అదుపులో ఉంచుకోవాలి. రోజువారీగా శరీరానికి తగినంత నీరు తాగాలి.

ఎవరు జాగ్రత్త వహించాలి..?

వైద్యుల సలహా లేకుండా డయాబెటిక్ రోగులు తేనెను తీసుకోకూడదు. ఒక సంవత్సరం లోపు వయసున్న పిల్లలకు తేనె అస్సలు తినిపించకూడదు. పుప్పొడి అలెర్జీ (Pollen Allergy) ఉన్నవారు తేనెను వాడే ముందు జాగ్రత్తలు తీసుకోవాలి.

ఇది కూడా చదవండి..చిన్నారులలో అరుదైన జన్యుపరమైన వ్యాధుల నిర్ధారణకు సరికొత్త రక్త పరీక్ష.. 

ఇది కూడా చదవండి..రోజూ బెల్లం తింటే బరువు పెరుగుతారా..?

ఇది కూడా చదవండి..Chest Pain : ఛాతీలో నొప్పా..? అది గుండెపోటా..? లేక పానిక్ అటాకా..? తేడా ఎలా గుర్తించాలి..?

ఇది కూడా చదవండి..టిపికల్ ఫీవర్స్ అంటే ఏమిటి..? వాటి లక్షణాలు ఎలా ఉంటాయి..?

గమనిక: ఇది కేవలం సమాచారంగా మాత్రమే భావించండి.. ఈ సమాచారం ఆధారంగా ఆరోగ్య సమస్యలకు సంబంధించిన నిర్ణయాలు తీసుకోవద్దు. అందుకోసం వైద్య నిపుణులను సంప్రదించండి.