Ice Bottle Therapy : పాదాల నొప్పులకు చెక్ పెట్టే 'ఐస్ బాటిల్ థెరపీ'.. నిజంగా పనిచేస్తుందా..?

సాక్షి లైఫ్ : సోషల్ మీడియాలో నిత్యం ఎన్నో సరికొత్త ఆరోగ్య ట్రెండ్స్ వైరల్ అవుతుంటాయి. వాటిలో ప్రస్తుతం విపరీతంగా ప్రాచుర్యం పొందుతున్నదే 'ఐస్ బాటిల్ థెరపీ'. గడ్డకట్టిన నీటి బాటిల్‌ను పాదాల కింద పెట్టుకుని దొర్లించడం ద్వారా నొప్పి, అలసట నుంచి తక్షణమే ఉపశమనం లభిస్తుందని పలువురు చెబుతున్నారు. ముఖ్యంగా 'ప్లాంటార్ ఫాసైటిస్' అంటే అరికాళ్లు, మడమ నొప్పి తో బాధపడేవారికి ఇది చక్కటి ఇంటి చికిత్సగా ప్రచారంలో ఉంది. అయితే, ఇంటర్నెట్‌లో కనిపించే ప్రతి ట్రెండ్ శాస్త్రీయంగా సురక్షితమైనది కాకపోవచ్చు. ఐస్ కంప్రెస్‌లు పాదాల నొప్పులకు మేలు చేసినప్పటికీ, దీన్ని సరైన పద్ధతిలో చేయకపోతే హాని జరిగే ప్రమాదం ఉంది. ఈ థెరపీ వెనుక ఉన్న నిజానిజాలు, లాభాలు, మరియు తీసుకోవాల్సిన జాగ్రత్తల గురించి వివరంగా తెలుసుకుందాం.. 

ఇది కూడా చదవండి..Knee Cartilage Damage : మోకాళ్లలో ‘జిగురు’ తగ్గుతోందా..? ఈ లక్షణాలు కనిపిస్తే అస్సలు నిర్లక్ష్యం వద్దు..!

ఇది కూడా చదవండి..Detox Water : కాపర్ బాటిల్‌లో 'డిటాక్స్ వాటర్' ఎందుకు ప్రమాదకరం..?

ఇది కూడా చదవండి..Dangerous Diabetes : మధుమేహం విషయంలో టైప్ 1 లేదా టైప్ 2, ఏది ఎక్కువ ప్రమాదకరం..?

ఐస్ బాటిల్ థెరపీతో కలిగే ఆరోగ్య ప్రయోజనాలు..?

 ఎక్కువసేపు నిలబడటం, నడవడం లేదా కఠినమైన వ్యాయామం చేయడం వల్ల పాదాల్లో వచ్చే నొప్పికి ఐస్ థెరపీ బాగా పనిచేస్తుంది. ఐస్ బాటిల్‌ను మెల్లగా దొర్లించడం వల్ల కండరాలకు ఉపశమనం లభిస్తుంది.

ప్లాంటార్ ఫాసైటిస్‌కు చెక్..

 మడమలు, అరికాళ్లలో తీవ్రమైన నొప్పితో బాధపడేవారికి వైద్యులు సాధారణంగా స్ట్రెచింగ్ వ్యాయామాలతో పాటు కోల్డ్ థెరపీని సూచిస్తుంటారు. అందుకు ఐస్ బాటిల్‌ను ఉపయోగించడం ఒక సులభమైన, సమర్థవంతమైన మార్గం.

వాపును తగ్గిస్తుంది..

అధిక శ్రమ వల్ల పాదాల్లో వచ్చే తేలికపాటి వాపును తగ్గించడంలో చల్లదనం సహాయపడుతుంది. ఇది రక్తనాళాలను తాత్కాలికంగా సంకోచింపజేసి వాపు, అసౌకర్యాన్ని దూరం చేస్తుంది.

కండరాల సడలింపు.. 

రోజంతా బిజీ షెడ్యూల్ తర్వాత పాదాల కండరాలు బిగుసుకుపోయినట్లు అనిపిస్తే, ఈ థెరపీ కండరాల బిగువును తగ్గించి, ఎంతో హాయిని, తాజాదనాన్ని అందిస్తుంది.

సరైన పద్ధతిలో ఎలా చేయాలి..?

ఈ థెరపీని సురక్షితంగా ఇంట్లో చేసుకోవడానికి ఈ కింది నియమాలు పాటించాలి.

ఒక ప్లాస్టిక్ సీసాలో నీరు నింపి ఫ్రిజ్‌లో ఉంచి గడ్డకట్టించండి.

కుర్చీలో సౌకర్యవంతంగా కూర్చుని, ఆ బాటిల్‌ను నేలపై ఉంచి పాదాల కింద నెమ్మదిగా ముందుకు, వెనకకు దొర్లించాలి.

ఒకసారికి 10 నుంచి 15 నిమిషాల కంటే ఎక్కువ సమయం అస్సలు చేయకూడదు.

అవసరాన్ని బట్టి రోజుకు 2 లేదా 3 సార్లు మాత్రమే చేయవచ్చు.

చర్మానికి నేరుగా ఐస్ తగలడం వల్ల ఇబ్బంది అనిపిస్తే, బాటిల్ చుట్టూ పల్చటి క్లాత్ చుట్టుకోవచ్చు. థెరపీ సమయంలో విపరీతమైన నొప్పి, తిమ్మిరి లేదా చర్మం రంగు మారడం గమనిస్తే వెంటనే ఆపేయాలి.

ఈ జాగ్రత్తలు తప్పనిసరి..!

ఐస్ థెరపీ అందరికీ సురక్షితం కాదు. కొన్ని ఆరోగ్య సమస్యలు ఉన్నవారు దీనికి దూరంగా ఉండటమే మేలు.

ఎవరు చేయకూడదు..?

మధుమేహ వ్యాధిగ్రస్తులకు పాదాల్లో స్పర్శ తక్కువగా ఉంటుంది కాబట్టి గాయాలయ్యే ప్రమాదం ఉంది, రక్త ప్రసరణ సమస్యలు ఉన్నవారు, చలి వల్ల అలర్జీలు వచ్చే వారు, పాదాలపై తెరిచిన గాయాలు లేదా ఇన్ఫెక్షన్లు ఉన్నవారు ఈ థెరపీని వాడకూడదు. చర్మ సమస్యలు..మోతాదుకు మించి ఎక్కువసేపు ఐస్ పాదాలకు తగలడం వల్ల తిమ్మిర్లు రావడం, ఫ్రాస్ట్‌బైట్ అంటే చలికి చర్మం దెబ్బతినడం..వంటి సమస్యలు రావచ్చు. ఇది కేవలం తాత్కాలిక ఉపశమనం మాత్రమే. మడమ నొప్పి తీవ్రంగా ఉన్నా, వాపు తగ్గకపోయినా, నడవడం కష్టంగా మారినా కేవలం ఇంటి చికిత్సలకే పరిమితం కాకుండా వెంటనే ఆర్థోపెడిక్ లేదా ఫిజియోథెరపీ నిపుణులను సంప్రదించాలి.

ఇది కూడా చదవండి..మందులతో పని లేకుండా బ్యాడ్ కొలెస్ట్రాల్ తగ్గేదెలా..?

ఇది కూడా చదవండి..Jamun Benifits : జీర్ణ సమస్యలకు సరైన దివ్యౌషధం నేరేడు పండు.. 

ఇది కూడా చదవండి..కిడ్నీలు పనిచేయడం లేదని ఎలా తెలుసుకోవాలి..?

గమనిక: ఇది కేవలం సమాచారంగా మాత్రమే భావించండి.. ఈ సమాచారం ఆధారంగా ఆరోగ్య సమస్యలకు సంబంధించిన నిర్ణయాలు తీసుకోవద్దు. అందుకోసం వైద్య నిపుణులను సంప్రదించండి.