Shortness of Breath While Climbing Stairs : మెట్లు ఎక్కగానే ఆయాసం వస్తోందా..? గుండె జబ్బులతో పాటు ఈ తీవ్రమైన వ్యాధులకు సంకేతం కావచ్చు..!

సాక్షి లైఫ్ : కొన్ని మెట్లు ఎక్కగానే ఆయాసంగా అనిపిస్తోందా..? చిన్నపాటి పనులకే అలసిపోతున్నారా..? అయితే, దీన్ని కేవలం వయసు పైబడటం వల్లనో లేదా సాధారణ నీరసంగానో భావించి నిర్లక్ష్యం చేయవద్దు. ఇది గుండె, ఊపిరితిత్తులు లేదా ఇతర తీవ్రమైన ఆరోగ్య సమస్యలకు ముందస్తు సంకేతం కావచ్చు. సకాలంలో కారణాన్ని గుర్తించడం ద్వారా భవిష్యత్తులో వచ్చే ప్రమాదాల నుంచి బయటపడవచ్చు.

 ఇది కూడా చదవండి.. ఎర్ర రక్త కణాలు, తెల్ల రక్త కణాల మధ్య వ్యత్యాసం..?

ఇది కూడా చదవండి..Chest Pain : ఛాతీలో నొప్పా..? అది గుండెపోటా..? లేక పానిక్ అటాకా..? తేడా ఎలా గుర్తించాలి..?

ఇది కూడా చదవండి.. ఆయుష్షు రహస్యాలను గురించి చెప్పిన 111ఏళ్ల వృద్ధుడు..

పెద్దగా శ్రమ పడకుండానే తరచుగా ఆయాసం వస్తున్నా, దానికి తోడు ఛాతీలో నొప్పి, కళ్లు తిరగడం, గుండె వేగంగా కొట్టుకోవడం లేదా కాళ్లలో వాపు వంటి లక్షణాలు కనిపిస్తే వెంటనే వైద్యులను సంప్రదించడం తప్పనిసరి. మెట్లు ఎక్కుతున్నప్పుడు ఆయాసం రావడం ఏయే వ్యాధులకు సంకేతమో ఇప్పుడు తెలుసుకుందాం..

1. గుండె పనితీరు మందగించడం..

మెట్లు ఎక్కేటప్పుడు ఆయాసం రావడం అనేది గుండె బలహీనతకు లేదా దాని పనితీరు మందగించడానికి ప్రాథమిక సంకేతం కావచ్చు. గుండె శరీరానికి తగినంత రక్తాన్ని, ఆక్సిజన్‌ను పంప్ చేయలేన ప్పుడు చిన్నపాటి శ్రమకే శ్వాస వేగంగా మారుతుంది. దీనికి తోడు ఛాతీ నొప్పి, కాళ్లలో వాపు, విపరీతమైన అలసట లేదా గుండె లయ తప్పినట్లు అనిపిస్తే ఏమాత్రం ఆలస్యం చేయకుండా కార్డియాలజిస్ట్‌ను సంప్రదించాలి.

2. ఊపిరితిత్తుల సమస్యలు..

ఆస్తమా, క్రానిక్ అబ్స్ట్రక్టివ్ పల్మనరీ డిసీజ్ (COPD) లేదా ఇతర ఊపిరితిత్తుల సంబంధిత వ్యాధుల వల్ల కూడా మెట్లు ఎక్కేటప్పుడు శ్వాస తీసుకోవడంలో తీవ్ర ఇబ్బంది తలెత్తుతుంది. ఇలాంటి వారు తరచుగా ఛాతీ పట్టేసినట్లు అనిపించడం, దగ్గు లేదా శ్వాస తీసుకునేటప్పుడు పిల్లికూతలు (wheezing) రావడం గమనించవచ్చు. ఈ సమస్య పునరావృతమవుతుంటే పల్మనరీ ఫంక్షన్ టెస్ట్ చేయించుకోవడం ఉత్తమం.

3. రక్తహీనత (Anemia)..

శరీరంలో హిమోగ్లోబిన్ శాతం పడిపోయినప్పుడు అవయవాలకు తగినంత ఆక్సిజన్ అందదు. దీని ప్రభావం వల్ల చిన్నపాటి శారీరక శ్రమకే ఆయాసం రావడం, నీరసం, కళ్లు తిరగడం, త్వరగా అలసిపోవడం వంటివి జరుగుతాయి. వైద్యుల సలహాతో పాటు ఐరన్ అధికంగా ఉండే సమతులాహారం తీసుకోవడం ద్వారా ఈ పరిస్థితిని మెరుగుపరుచుకోవచ్చు.

4. ఊబకాయం, ఫిట్‌నెస్ లేకపోవడం..

అధిక బరువు ఉన్నా లేదా దీర్ఘకాలంగా ఎలాంటి శారీరక వ్యాయామం చేయకపోయినా మెట్లు ఎక్కినప్పుడు త్వరగా ఆయాసం వస్తుంది. అధిక బరువు కారణంగా గుండె, ఊపిరితిత్తులపై తీవ్రమైన ఒత్తిడి పడుతుంది. క్రమం తప్పకుండా వ్యాయామం చేయడం, ఆరోగ్యకరమైన ఆహారపు అలవాట్లు అలవర్చుకోవడం, నెమ్మదిగా బరువు తగ్గడం ద్వారా ఈ సమస్యకు చెక్ పెట్టవచ్చు.

5. అధిక రక్తపోటు, ఇతర జీవక్రియ సమస్యలు..

నియంత్రణలో లేని అధిక రక్తపోటు (hypertension), మధుమేహం (diabetes) లేదా థైరాయిడ్ వంటి సమస్యలు కూడా శరీర పనితీరును దెబ్బతీస్తాయి. ఈ వ్యాధులలో కూడా తరచుగా ఆయాసం, అలసట, నీరసం వంటి లక్షణాలు కనిపిస్తాయి. కాబట్టి ఈ సమస్య నిరంతరంగా వేధిస్తుంటే వెంటనే బీపీ, బ్లడ్ షుగర్ వంటి అవసరమైన పరీక్షలు చేయించుకోవడం అవసరం.

ఏ లక్షణాలను అస్సలు నిర్లక్ష్యం చేయకూడదు..?

మెట్లు ఎక్కేటప్పుడు ఆయాసంతో పాటు ఈ లక్షణాలు కనిపిస్తే దానిని 'మెడికల్ ఎమర్జెన్సీ'గా పరిగణించాలి..

ఛాతీలో నొప్పి లేదా పట్టేసినట్లు ఉండటం.

 చెమటలు పట్టడం, స్పృహ కోల్పోవడం.

గుండె అతి వేగంగా లేదా అసాధారణంగా కొట్టుకోవడం.

పెదాలు లేదా వేళ్లు నీలం రంగులోకి మారడం.

విశ్రాంతి తీసుకున్నప్పటికీ ఆయాసం ఏమాత్రం తగ్గకపోవడం.

ఇలాంటి పరిస్థితుల్లో ఏమాత్రం నిర్లక్ష్యం చేయకుండా వెంటనే వైద్యులను సంప్రదించి తగిన చికిత్స తీసుకోవాలి.  

ఇది కూడా చదవండి..చిన్నారులలో అరుదైన జన్యుపరమైన వ్యాధుల నిర్ధారణకు సరికొత్త రక్త పరీక్ష.. 

ఇది కూడా చదవండి.. WHO Report : ఈ వ్యాధి ప్రపంచంలో అత్యధిక మరణాలకు కారణమవుతోంది.. 

ఇది కూడా చదవండి..మైక్రోసైటిక్ అనీమియా అంటే ఏమిటి..?  

గమనిక: ఇది కేవలం సమాచారంగా మాత్రమే భావించండి.. ఈ సమాచారం ఆధారంగా ఆరోగ్య సమస్యలకు సంబంధించిన నిర్ణయాలు తీసుకోవద్దు. అందుకోసం వైద్య నిపుణులను సంప్రదించండి.