Family Health care : కుటుంబ ఆరోగ్యం నేటి వెల్‌నెస్.. రేపటి భద్రత..! రెండింటినీ బ్యాలెన్స్ చేయడం ఎలా..?

సాక్షి లైఫ్ : మారుతున్న కాలంలో కేవలం పౌష్టికాహారం తీసుకోవడం, రోజూ వ్యాయామం చేయడం మాత్రమే సరిపోదు. నేటి ఆరోగ్యకరమైన జీవనశైలితో పాటు భవిష్యత్తులో వచ్చే అనారోగ్య సమస్యలను ఆర్థికంగా ఎదుర్కొనేందుకు కూడా కుటుంబాలు సన్నద్ధం కావాలి. దీన్నే 'వెల్‌నెస్ అండ్ హెల్త్ ప్రిపేర్డ్‌నెస్' (Wellness and Health Preparedness) అంటారు. సరైన ఫిట్‌నెస్, నివారణ చర్యలతో పాటు.. అత్యవసర నిధి, ఆరోగ్య బీమా (health insurance) ద్వారా కుటుంబానికి సంపూర్ణ రక్షణ ఎలా కల్పించాలో చూద్దాం..

ఇది కూడా చదవండి..లవ్ హార్మోన్ అంటే ఏమిటి..?

ఇది కూడా చదవండి..చెడు కొలెస్ట్రాల్ ను నియంత్రించే పనస పండు.. 

ఇది కూడా చదవండి..నోటి దుర్వాసనను తగ్గించే చిట్కాలు 

ఈ బ్యాలెన్సింగ్ ఎందుకు అవసరం..?

ఒత్తిడితో కూడిన ఉద్యోగాలు, గంటల తరబడి కూర్చుని పని చేయడం, కాలుష్యం తదితర కారణాల వల్ల చిన్న వయసులోనే దీర్ఘకాలిక వ్యాధులు చుట్టుముడుతున్నాయి. పండ్లు తినడం, యోగా చేయడం లాంటివి అనారోగ్యాల ముప్పును తగ్గిస్తాయి కానీ, ఆకస్మిక ప్రమాదాలు లేదా జబ్బుల నుంచి పూర్తిగా కాపాడలేవు. తీవ్రమైన అనారోగ్యాల బారిన పడినప్పుడు ఆసుపత్రి ఖర్చులు కుటుంబ ఆర్థిక వ్యవస్థను కుదిపేస్తాయి. అందుకే 'ఆరోగ్య రక్షణ, ఆర్థిక భద్రత' రెండూ ఒకే నాణేనికి బొమ్మాబొరుసు లాంటివి.

సమగ్రమైన హెల్త్ ప్లానింగ్ అంటే..? 

ఒక ఆదర్శవంతమైన కుటుంబ ఆరోగ్య ప్రణాళిక కేవలం జిమ్ చేయడం వరకే పరిమితం కాకూడదు. అందులో ఈ కింది అంశాలు ఉండాలి. దైనందిన అలవాట్లు..సమతుల్య ఆహారం, తగినంత నిద్ర, రోజూ వ్యాయామం చేయడం. ప్రివెంటివ్ కేర్.. కుటుంబ ఆరోగ్య చరిత్ర (Family Medical History) తెలుసుకుని అప్రమత్తంగా ఉండటం. ఆర్థిక భద్రత..వైద్య అత్యవసరాల కోసం కొంత నిధిని పక్కన పెట్టడం. సరైన హెల్త్ ఇన్సూరెన్స్ పాలసీని తీసుకోవడం.

ప్రివెంటివ్ హెల్త్ చెకప్.. 

వ్యాధి ముదిరాక ఆసుపత్రికి పరుగెత్తే కన్నా, రాకముందే పసిగట్టడం ఉత్తమం. ఏటా మాస్టర్ హెల్త్ చెకప్‌లు, బీపీ, షుగర్ పరీక్షలు చేయించుకోవడం వల్ల భవిష్యత్తు ముప్పును ముందుగానే గుర్తించవచ్చు. వంశపారంపర్యంగా వచ్చే ఆరోగ్య సమస్యలు ఉన్న కుటుంబాలకు ఈ నివారణ పరీక్షలు ఎంతో కీలకం.

ఆరోగ్య బీమా ఎంపికలో మెలకువలు..

కుటుంబ ఆర్థిక ప్రణాళికలో హెల్త్ ఇన్సూరెన్స్ చాలా ముఖ్యం. పాలసీ తీసుకునేటప్పుడు కేవలం తక్కువ ప్రీమియం చూసి మోసపో కూడదు. ఈ అంశాలను కచ్చితంగా పరిశీలించాలి. సమ్ అష్యూర్డ్ (Sum Insured)..భవిష్యత్తులో పెరిగే వైద్య ఖర్చులకు సరిపోయేలా కవరేజీ మొత్తం ఉందో లేదో చూసుకోవాలి. నెట్‌వర్క్ ఆసుపత్రులు..నగదు రహిత చికిత్స కోసం మీకు అందుబాటులో ఉన్న ఆసుపత్రుల జాబితాను చెక్ చేయాలి.

వెయిటింగ్ పీరియడ్.. కొన్ని దీర్ఘకాలిక వ్యాధులకు వెంటనే కవరేజీ రాదు. ఎన్ని నెలలు లేదా సంవత్సరాల వెయిటింగ్ పీరియడ్ ఉందో తెలుసుకోవాలి. మినహాయింపులు (Exclusions)..పాలసీలో ఏయే జబ్బులకు క్లెయిమ్ వర్తించదో ముందుగానే స్పష్టత తెచ్చుకోవడం ముఖ్యం.

దీర్ఘకాలిక భద్రత కోసం సింపుల్ స్టెప్స్..

కుటుంబ సభ్యులందరికీ ఒకే పాలసీ కింద వర్తించేలా 'ఫ్యామిలీ ఫ్లోటర్ హెల్త్ ఇన్సూరెన్స్' తీసుకోవడం లాభదాయకం. పిల్లలు పెద్దవుతున్న కొద్దీ, అలాగే కుటుంబ సభ్యుల వయసు పెరుగుతున్న కొద్దీ హెల్త్ ఇన్సూరెన్స్ కవరేజీని సమీక్షించుకుని, పెంచుకుంటూ పోవాలి.

కుటుంబ సభ్యులందరి మెడికల్ రికార్డులను, ప్రిస్క్రిప్షన్లను ఒకేచోట భద్రపరుచుకోవాలి. అత్యవసర సమయాల్లో సంప్రదించాల్సిన ఫోన్ నంబర్లు, పాలసీ వివరాలు కుటుంబ సభ్యులందరికీ తెలిసేలా ఉంచాలి. నేటి మన జీవనశైలే రేపటి మన ఆరోగ్యానికి పునాది. కేవలం ఫిట్‌నెస్‌పై మాత్రమే దృష్టి పెడితే సరిపోదు.. ప్రివెంటివ్ కేర్, సరైన బీమా, అత్యవసర వైద్య పొదుపు ఉన్నప్పుడే ఏ కుటుంబానికైనా సంపూర్ణమైన ఆరోగ్య, ఆర్థిక భద్రత లభిస్తుంది.

ఇది కూడా చదవండి..టిపికల్ ఫీవర్స్ అంటే ఏమిటి..? వాటి లక్షణాలు ఎలా ఉంటాయి..? 

ఇది కూడా చదవండి..గుండె నొప్పిని ఎలా గుర్తించవచ్చు..?

ఇది కూడా చదవండి..మీరు ఆరోగ్యంగా బరువు తగ్గాలంటే..? 

గమనిక: ఇది కేవలం సమాచారంగా మాత్రమే భావించండి.. ఈ సమాచారం ఆధారంగా ఆరోగ్య సమస్యలకు సంబంధించిన నిర్ణయాలు తీసుకోవద్దు. అందుకోసం వైద్య నిపుణులను సంప్రదించండి..