Health Alert : భోజనంలో రోజూ ఊరగాయ.. అమృతమా..? అనారోగ్యమా..? నిజాలు తెలుసుకోండి..!

సాక్షి లైఫ్ : భారతీయుల పళ్లెంలో, ముఖ్యంగా తెలుగు వారి ఇళ్లలో ఊరగాయ (Pickle) లేని భోజనాన్ని ఊహించలేం. వేడి వేడి అన్నంలో ముద్దపప్పు, ఆవకాయ వేసుకుని తింటే వచ్చే తృప్తే వేరు. అయితే, రుచికి అమృతంలా అనిపించే ఈ ఊరగాయలను ప్రతిరోజూ భోజనంతో పాటు లాగించేయడం ఆరోగ్యానికి ఎంతవరకు మంచిది..? నిపుణులు ఏమంటున్నారు..? ఈ అలవాటు వల్ల కలిగే లాభనష్టాలను గురించి ఇప్పుడు తెలుసుకుందాం.. 

ఇది కూడా చదవండి.. ప్రీమెన్‌ స్ట్రువల్ సిండ్రోమ్ వచ్చేముందు లక్షణాలు ఎలా ఉంటాయి..?

ఇది కూడా చదవండి..వేగంగా బరువు తగ్గించే ఓట్జెంపిక్ డ్రింక్ ట్రెండ్.. డైటీషియన్లు ఏమంటున్నారంటే..? 

ఇది కూడా చదవండి.. గుండె నొప్పిని ఎలా గుర్తించవచ్చు..?

ఊరగాయలతో కలిగే ఆరోగ్య ప్రయోజనాలు..

సాంప్రదాయ పద్ధతిలో ఇంట్లో తయారుచేసే ఊరగాయలను మితంగా తీసుకుంటే కొన్ని అద్భుతమైన ప్రయోజనాలు అందుతాయని ఆరోగ్య నిపుణులు చెబుతున్నారు.

జీర్ణక్రియకు దోహదం..

 నిమ్మకాయ, ఉసిరి వంటి ఊరగాయలు సహజంగా పులియబెట్టడం (Fermentation) వల్ల వాటిలో 'ప్రోబయోటిక్స్' అనబడే మంచి బ్యాక్టీరియా వృద్ధి చెందుతుంది. ఇది పేగుల ఆరోగ్యాన్ని మెరుగుపరిచి, గ్యాస్, మలబద్ధకం వంటి సమస్యలను తగ్గిస్తుంది.

యాంటీఆక్సిడెంట్స్ నిధి..

ఊరగాయల్లో వాడే పసుపు, ఆవాలు, మెంతులు, నల్లజీలకర్ర వంటి దినుసుల్లో యాంటీఆక్సిడెంట్లు, యాంటీ బాక్టీరియల్ గుణాలు పుష్కలంగా ఉంటాయి. ఇవి శరీరంలో ఫ్రీ రాడికల్స్‌తో పోరాడి రోగనిరోధక శక్తిని పెంచుతాయి.

పోషకాల లభ్యత..

 ఉదాహరణకు నిమ్మకాయ ఊరగాయ ద్వారా విటమిన్-సి లభిస్తుంది. అలాగే మసాలాల ద్వారా కొన్ని రకాల సూక్ష్మపోషకాలు (Micronutrients) శరీరానికి అందుతాయి.

అతిగా తింటే ముప్పే.. 

ఊరగాయలు ఎక్కువ కాలం నిల్వ ఉండటానికి అధిక మొత్తంలో ఉప్పు, నూనె ఉపయోగిస్తారు. వీటిని ప్రతిరోజూ అధికంగాతీసుకోవడం వల్ల తీవ్రమైన ఆరోగ్య సమస్యలు తలెత్తుతాయని వైద్యులు హెచ్చరిస్తున్నారు. 

అతిగా ఊరగాయలు తినడం వల్ల శరీరంపై పడే ప్రభావం..

ఊరగాయలను పరిమితికి మించి ప్రతిరోజూ తీసుకోవడం వల్ల శరీరంలోని వివిధ అవయవాలపై తీవ్రమైన దుష్ప్రభావాలు పడతాయని వైద్య నిపుణులు హెచ్చరిస్తున్నారు. ముఖ్యంగా, ఊరగాయలలో ఉండే అధిక సోడియం (salt) వల్ల శరీరంలో రక్తపోటు వేగంగా పెరిగి, గుండె, మూత్రపిండాల (కిడ్నీల) పనితీరుపై తీవ్ర ఒత్తిడి కలిగిస్తుంది. అలాగే, వీటి తయారీలో వాడే అధిక నూనె మరియు కొవ్వుల కారణంగా రక్తంలో చెడు కొలెస్ట్రాల్ (LDL) స్థాయిలు పెరిగి గుండె జబ్బుల ముప్పు ఎక్కువవుతుంది. 

అంతేకాకుండా కేలరీలు ఎక్కువగా ఉండటం వల్ల శరీర బరువు కూడా వేగంగా పెరుగుతుంది. ఊరగాయలలోని ఘాటైన కారం, మసాలాలు కడుపులో తీవ్రమైన మంట, ఎసిడిటీ, గుండెల్లో మంట (Heartburn) వంటి సమస్యలను తెచ్చిపెట్టడమే కాకుండా కడుపు లోపలి పొరను సైతం దెబ్బతీసి గ్యాస్ట్రిటిస్, అల్సర్లకు దారితీస్తాయి. వీటన్నింటితో పాటు, ఊరగాయలను సరిగ్గా నిల్వ చేయకపోతే వాటికి బూజు పట్టి 'అఫ్లాటాక్సిన్' వంటి అత్యంత ప్రమాదకరమైన విషపూరిత రసాయన సమ్మేళనాలు చేరుతాయి, ఇవి దీర్ఘకాలంలో కాలేయానికి (Liver) తీవ్రమైన హాని కలిగిస్తాయి.

మార్కెట్లో లభించే ప్యాక్ చేసిన కమర్షియల్ ఊరగాయలలో నిల్వ ఉండటానికి కృత్రిమ రసాయనాలు (Chemical Preservatives - సోడియం బెంజోయేట్ వంటివి), రంగులు వాడుతుంటారు. ఇవి దీర్ఘకాలంలో కాలేయం, కిడ్నీలపై తీవ్ర ప్రభావం చూపుతాయి.

మరి ఊరగాయలు తినాలా..? వద్దా..?

ఊరగాయను పూర్తిగా మానేయాల్సిన అవసరం లేదు. కానీ దానిని 'ఆహారం'లా కాకుండా కేవలం 'రుచి' కోసం మాత్రమే ఒక చిన్న ముద్దకు పరిమితం చేయాలని వైద్యనిపుణులు చెబుతున్నారు. ముఖ్యంగా ఇప్పటికే హైబీపీ, గుండె జబ్బులు, కిడ్నీ సమస్యలు ఉన్నవారు ఊరగాయలకు దూరంగా ఉండటమే మంచిది. ఆరోగ్యంగా ఉన్నవారు కూడా ఇంట్లో తయారుచేసిన పచ్చళ్లను రోజుకు ఒక చిన్న స్పూన్ కంటే ఎక్కువ తీసుకోకూడదని, కేవలం పచ్చడితోనే కడుపు నింపేసుకోకుండా తాజా కూరగాయలు, ఆకుకూరలతో కూడిన సమతులాహారానికి ప్రాధాన్యం ఇవ్వాలని నిపుణులు సూచిస్తున్నారు.

ఇది కూడా చదవండి.. చెడు కొలెస్ట్రాల్ ను నియంత్రించే పనస పండు.. 

ఇది కూడా చదవండి..మైక్రోసైటిక్ అనీమియా అంటే ఏమిటి..?  

ఇది కూడా చదవండి.. క్షయవ్యాధి ఏయే అవయవాలపై ప్రభావం చూపుతుంది..? 

గమనిక: ఇది కేవలం సమాచారంగా మాత్రమే భావించండి.. ఈ సమాచారం ఆధారంగా ఆరోగ్య సమస్యలకు సంబంధించిన నిర్ణయాలు తీసుకోవద్దు. అందుకోసం వైద్య నిపుణులను సంప్రదించండి.