Swine Flu Alert : కర్ణాటకలో H1N1తో ఒకరు మృతి.. మనమూ అప్రమత్తంగా ఉండాల్సిందే..!

సాక్షి లైఫ్ : పొరుగు రాష్ట్రమైన కర్ణాటకలో స్వైన్ ఫ్లూ (H1N1) మరణం నమోదు కావడం తీవ్ర ఆందోళనకు గురిచేస్తోంది. ఉత్తర కన్నడ జిల్లాకు చెందిన 41 ఏళ్ల వ్యక్తి ఈ శ్వాసకోశ ఇన్ఫెక్షన్‌తో చికిత్స పొందుతూ మంగళూరులోని ఒక ప్రైవేట్ ఆసుపత్రిలో మరణించారు. కేరళలో ఇప్పటికే నిపా, షిగెల్లా వైరస్‌లు భయపెడుతుండగా, ఇప్పుడు కర్ణాటకలో ఈ కేసు వెలుగుచూడటంతో ఆరోగ్య శాఖ ఉన్నతాధి కారులు అప్రమత్తమయ్యారు. వాతావరణంలో మార్పులు వస్తున్న తరుణంలో ఈ సీజనల్ ఫ్లూ ఎలా వ్యాపిస్తుంది..? దీని లక్షణాలు, నివారణోపాయాలు ఏమిటో తెలుసుకోవడం మనకూ ఎంతో అవసరం. ముందుజాగ్రత్త చర్యగా మృతుని కుటుంబ సభ్యులను, అతనితో సన్నిహితంగా మెలిగిన వారిని ఆరోగ్య సిబ్బంది నిరంతరం పర్యవేక్షిస్తున్నారు.

ఇది కూడా చదవండి..Sippers and Tumblers : సిప్పర్లు, టంబ్లర్లలో నీళ్లు తాగడం ఆరోగ్యానికి మంచిదేనా..?

ఇది కూడా చదవండి..Low Birth Weight : తక్కువ బరువుతో పుడితే.. పెద్దయ్యాక పక్షవాతం ముప్పు..! తాజా అధ్యయనం..

ఇది కూడా చదవండి.. వరల్డ్ డైజెస్టివ్ హెల్త్ డే ఎలా మొదలైంది..?

అసలు H1N1 అంటే ఏమిటి..?

స్వైన్ ఫ్లూ అనేది ‘ఇన్ఫ్లుయెంజా A’ వైరస్ అత్యంత వేగంగా వ్యాపించే ఒక ఉపరకం. 2009లో దీనిని ప్రపంచవ్యాప్త మహమ్మారిగా గుర్తించినప్పటికీ, ప్రస్తుతం ఇది ప్రతి ఏటా వచ్చే ఒక సాధారణ ‘సీజనల్ ఫ్లూ’గా మారింది. ముఖ్యంగా వాతావరణం మారినప్పుడు లేదా చల్లబడినప్పుడు ఈ వైరస్ తీవ్రత పెరుగుతుంది.

ఈ ఇన్ఫెక్షన్ ఎలా వ్యాపిస్తుంది..?

బాధితులు దగ్గినప్పుడు లేదా తుమ్మినప్పుడు వెలువడే సూక్ష్మమైన నీటి తుంపరల ద్వారా ఈ వైరస్ గాలిలో చేరి ఇతరులకు సోకుతుంది. వైరస్ ఉన్న ఉపరితలాలను డోర్ హ్యాండిల్స్, టేబుల్స్ మొదలైనవి  తాకిన చేతులతో కళ్లు, ముక్కు లేదా నోటిని ముట్టుకోవడం వల్ల కూడా ఈ ఇన్ఫెక్షన్ శరీరంలోకి ప్రవేశిస్తుంది. గాలి వెలుతురు సరిగా లేని గదులు, జనం ఎక్కువగా ఉండే రద్దీ ప్రాంతాలలో ఈ వైరస్ చాలా వేగంగా విస్తరిస్తుంది.

సాధారణ జలుబే కదా అని నిర్లక్ష్యం వద్దు..!

స్వైన్ ఫ్లూ ప్రారంభ లక్షణాలు సాధారణ ఫ్లూ తరహాలోనే ఉండటం వల్ల చాలామంది దీనిని గుర్తించడంలో ఆలస్యం చేస్తారు. దీనివల్ల సమస్య తీవ్రరూపం దాల్చుతుంది.

ప్రధాన లక్షణాలు ఎలా ఉంటాయంటే..?

తీవ్రమైన జ్వరం, గొంతు నొప్పి, పొడి దగ్గు

ముక్కు కారడం లేదా ముక్కు మూసుకుపోవడం

విపరీతమైన కండరాల నొప్పులు, తలనొప్పి, నీరసం

కొందరిలో వాంతులు, విరేచనాలు కావడం

తీవ్రమైన ముప్పు ఎవరికంటే..?

సాధారణంగా ఆరోగ్యంగా ఉన్నవారు వారం రోజుల్లో దీని నుండి కోలుకుంటారు. కానీ గర్భిణీ స్త్రీలు, చిన్న పిల్లలు, వృద్ధులతో పాటు.. గుండె జబ్బులు, శ్వాసకోశ సమస్యలు, మధుమేహం ఉన్నవారిలో ఈ వైరస్ తీవ్రమైన ‘న్యుమోనియా’కు దారితీసే ప్రమాదం ఉంది.

మనల్ని మనం కాపాడుకుందాం ఇలా..

స్వైన్ ఫ్లూ (H1N1) బారిన పడకుండా ఉండటానికి నిపుణులు సూచిస్తున్న కొన్ని ముఖ్యమైన జాగ్రత్తలను తప్పనిసరిగా పాటించాలి. ఇందులో భాగంగా వ్యక్తిగత పరిశుభ్రతకు అత్యంత ప్రాధాన్యత ఇవ్వాలి. ముఖ్యంగా బయటకు వెళ్లి వచ్చినప్పుడల్లా చేతులను సబ్బుతో లేదా శానిటైజర్‌తో కనీసం 20 సెకన్ల పాటు శుభ్రంగా కడుక్కోవడం అలవాటు చేసుకోవాలి. అలాగే, రద్దీగా ఉండే ప్రదేశాలకు వెళ్లేటప్పుడు లేదా జలుబు, దగ్గు వంటి లక్షణాలు ఉన్నవారికి సమీపంలో ఉన్నప్పుడు ముందస్తు జాగ్రత్తగా మాస్క్ తప్పనిసరిగా ధరించాలి.

మరోవైపు, ప్రాథమిక ఆరోగ్య సూత్రాలను పాటించడం ద్వారా ఈ వైరస్ ఇతరులకు వ్యాపించకుండా అడ్డుకట్ట వేయవచ్చు. మనం తుమ్మినప్పుడు లేదా దగ్గినప్పుడు ముక్కు, నోటికి రుమాలు అడ్డు పెట్టుకోవాలి. అలాగే వైరస్ శరీరంలోకి చేరకుండా ఉండటానికి చేతులను పదే పదే కళ్లు, ముక్కు, ముఖానికి దూరంగా ఉంచడం మంచిది. ఒకవేళ జ్వరం, దగ్గు వంటి లక్షణాలు రెండు మూడు రోజులకు మించినా, లేదా శ్వాస తీసుకోవడంలో స్వల్ప ఇబ్బంది అనిపించినా ఏమాత్రం నిర్లక్ష్యం చేయకూడదు. ఇలాంటి సమయాల్లో సొంత వైద్యం పూర్తిగా మానేసి, వెంటనే నిపుణులైన వైద్యుడిని సంప్రదించి తగిన చికిత్స తీసుకోవాలి.

ఇది కూడా చదవండి.. టాటూ వేయించుకున్న వాళ్లు రక్తదానంచేయకూడదా..? 

ఇది కూడా చదవండి..ఆరోగ్యప్రయోజనాలు పొందాలంటే సలాడ్ ను ఏ టైమ్ లో తినాలి..?

 ఇది కూడా చదవండి.. వాక్సిన్ గురించి వాస్తవాలు- అవాస్తవాలు.. 

ఇది కూడా చదవండి.. చల్లని వాతావరణం వల్ల సైనస్ సమస్యలు పెరుగుతాయా..? 

ఇది కూడా చదవండి.. నోటి దుర్వాసనను తగ్గించే చిట్కాలు 

గమనిక: ఇది కేవలం సమాచారంగా మాత్రమే భావించండి.. ఈ సమాచారం ఆధారంగా ఆరోగ్య సమస్యలకు సంబంధించిన నిర్ణయాలు తీసుకోవద్దు. అందుకోసం వైద్య నిపుణులను సంప్రదించండి.