గాంధీ హాస్పిటల్ లో క్యూఆర్ కోడ్ ఆధారిత ఓపీ విధానం అమలు.. సాంకేతిక సమస్యలు..   

సాక్షి లైఫ్ : హైదరాబాద్ మహానగరంలో ప్రభుత్వ వైద్యానికి చిరునామాగా నిలిచే గాంధీ ఆసుపత్రిలో కొత్తగా ప్రవేశపెట్టిన డిజిటల్ ఓపీ రిజిస్ట్రేషన్ విధానంతో రోగులు తీవ్ర ఇబ్బందులు పడుతున్నారు. నేషనల్ హెల్త్ అథారిటీ (ఎన్ హెచ్ ఏ) ఆధ్వర్యంలో అమల్లోకి తెచ్చిన ఈ క్యూఆర్ (QR) కోడ్ ఆధారిత ఓపీ విధానం రోగులకు సౌలభ్యం కల్పించాల్సింది పోయి, మరింత గందరగోళానికి దారితీసింది. ముఖ్యంగా డిజిటల్ అక్షరాస్యత లేని సామాన్య ప్రజలు, గ్రామీణ ప్రాంతాల రోగులు తీవ్ర ఇక్కట్లు పడుతున్నారు.

ఇది కూడా చదవండి..పీసీఓడీ సమస్యకు ప్రధాన కారణాలు ఏమిటి..? 

ఇది కూడా చదవండి..సంతానోత్పత్తిని పెంచడానికి ఎలాంటి ఫుడ్స్ తప్పనిసరి అంటే..? 

ఇది కూడా చదవండి..కిడ్నీ దానం చేసిన తర్వాత ఆ వ్యక్తికి ఎలాంటి ఫాలో-అప్ కేర్ అవసరం..? 

డిజిటల్ క్యూలో 'లాంగ్ క్యూ'..  

గతంలో ఉన్న స్లిప్ ఆధారిత రిజిస్ట్రేషన్‌ను రద్దు చేసి, ఆయుష్మాన్ భారత్ హెల్త్ అకౌంట్ (ABHA) ద్వారా క్యూఆర్ కోడ్ స్కాన్ చేసి రిజిస్ట్రేషన్ చేసుకునే విధానాన్ని ఆసుపత్రి ప్రవేశపెట్టింది. స్మార్ట్‌ఫోన్ లేనివారికి కష్టాలు: ఆసుపత్రికి వచ్చే రోగుల్లో చాలామందికి స్మార్ట్‌ఫోన్లు లేకపోవడం, ఉన్నా ఇంటర్నెట్ రీఛార్జ్ లేకపోవడంతో రిజిస్ట్రేషన్ ప్రక్రియ నిలిచిపోతోంది. కొత్త విధానం ఉన్నా, పాత స్లిప్ కౌంటర్ల వద్దే ఉదయం 7:30 గంటల నుంచే రోగులు పొడవాటి క్యూలైన్లలో పడిగాపులు కాస్తున్నారు.

సాంకేతిక సమస్యలతో ఇబ్బందులు.. 

కేవలం రిజిస్ట్రేషన్ మాత్రమే కాక, ల్యాబ్ రిపోర్టులు, వైద్యుల సంప్రదింపుల కోసం కూడా డిజిటల్ విధానంపై ఆధారపడాల్సి వస్తోంది. దీంతో సాంకేతిక పరిజ్ఞానంపై అవగాహన లేని రోగులు అష్టకష్టాలు పడుతున్నారు.

అయితే, ఆసుపత్రి సిబ్బంది మాత్రం ఈ విధానం సమయాన్ని ఆదా చేస్తుందని, ప్రస్తుతం ఏర్పడిన చిన్నచిన్న సమస్యలను పరిష్కరిస్తున్నామని అధికారులు చెబుతున్నారు. పాత విధానం నుంచి కొత్త విధానానికి మారే క్రమంలో ఇలాంటి ఇబ్బందులు సాధారణమేనని అంటున్నారు.

డిజిటల్ ఇండియా లక్ష్యం మంచిదే అయినా, పేదలు, వృద్ధులు ఎక్కువగా ఆధారపడే ప్రభుత్వ ఆసుపత్రులలో సాంకేతిక పరిజ్ఞానం, అవగాహన కొరత కారణంగా రోగులకు ఇబ్బంది కలగకుండా ప్రత్యామ్నాయ మార్గాలను కూడా అందుబాటులో ఉంచాల్సిన అవసరం ఉందని ఈ పరిస్థితి స్పష్టం చేస్తోంది. డిజిటల్ సౌలభ్యం. రోగుల కష్టంగా మారకుండా అధికారులు తక్షణ చర్యలు తీసుకోవాలని రోగులు కోరుతున్నారు.

ఇది కూడా చదవండి..ఈ 5 సప్లిమెంట్స్ కు డబ్బు దండగ అంటున్న వైద్యనిపుణులు..! 

ఇది కూడా చదవండి..వేగంగా బరువు తగ్గించే ఓట్జెంపిక్ డ్రింక్ ట్రెండ్.. డైటీషియన్లు ఏమంటున్నారంటే..? 

గమనిక: ఇది కేవలం సమాచారంగా మాత్రమే భావించండి.. ఈ సమాచారం ఆధారంగా ఆరోగ్య సమస్యలకు సంబంధించిన నిర్ణయాలు తీసుకోవద్దు. అందుకోసం వైద్య నిపుణులను సంప్రదించండి.