మానసిక ఆరోగ్యాన్ని మెరుగుపరిచే 5 రోజువారీ అలవాట్లు..
సాక్షి లైఫ్ : ప్రపంచ ఆరోగ్య దినోత్సవాన్ని ప్రతి సంవత్సరం ఏప్రిల్ 7న జరుపు కుంటారు. ఈ దినోత్సవం ఉద్దేశ్యం ఆరోగ్యం గురించి ప్రజలకు అవగాహన కల్పించడమే, కానీ ఇప్పుడు శరీరక ఆరోగ్యమేకాదు, మానసిక ఆరోగ్యం కూడా ప్రధానమైందే. మానసిక ఆరోగ్యంపై కూడా ప్రత్యేకంగా శ్రద్ధ పెట్టాల్సిన అవసరం ఎంతైనా ఉందని వైద్యనిపుణులు చెబుతున్నారు. మానసిక ఆరోగ్యాన్ని మెరుగుపరిచే కొన్ని అలవాట్లను తప్పనిసరిగా అనుసరించాలని వారు సూచిస్తున్నారు.. అవేంటంటే..?
నేటి కాలంలో, శారీరక ఆరోగ్యంతో పాటు మానసిక ఆరోగ్యాన్ని కూడా జాగ్రత్తగా చూసుకోవడం చాలా ముఖ్యం.. ఎందుకంటే..? బిజీ జీవితం, పని ఒత్తిడి, సోషల్ మీడియా, ఒంటరితనం.. ఇవన్నీ మానసిక ఆరోగ్యంపై తీవ్ర ప్రభావం చూపిస్తాయి
ధ్యానం, యోగా..
మన రోజు మొత్తం మానసిక స్థితి మన రోజు ఎలా ప్రారంభమవుతుందో దానిపైనే ఆధారపడి ఉంటుంది. రోజును ధ్యానంతో ప్రారంభిస్తే, మీ మనస్సు ప్రశాంతంగా ఉంటుంది. రోజుకు కేవలం 10 నిమిషాలు ధ్యానం చేయడం వల్ల ప్రతికూల ఆలోచనలు తగ్గుతాయి. ఆందోళన, ఒత్తిడి స్థాయిలు తగ్గుతాయి. ఒకవేళ ప్రారంభంలో ఏకాగ్రత పెట్టడం కష్టంగా అనిపిస్తే, ధ్యానం, ప్రశాంతమైన సంగీతం వినడం లేదా మీ శ్వాసపై దృష్టి పెట్టడం ద్వారా ప్రయత్నించవచ్చు. ఈ అలవాటు క్రమంగా మనస్సును స్థిరంగా, ప్రశాంతంగా ఉంచుతుంది.
నిద్రలేవగానే..
ఉదయం నిద్రలేవగానే మొబైల్ చెక్ చేయడం. వాట్సాప్, ఇన్‌స్టాగ్రామ్ లేదా ఇమెయిల్‌ని ఒక్కసారి చూడటం వల్ల మెదడులో ఒత్తిడి పెరుగుతుంది. ఈ అలవాటు మనకు తెలియకుండానే ఒత్తిడిని పెంచేస్తుంది. కాబట్టి, మీరు ఉదయం కొన్ని నిమిషాలు నిశ్శబ్ద వాతావరణంలో కూర్చుని, మృదువైన సంగీతం వింటే లేదా నడకకు వెళితే, మీరు రోజంతా మానసికంగా మరింత స్థిరంగా, సంతోషంగా ఉండగలుగుతారు.
ప్రకృతితో అనుసంధానం..
ప్రకృతితో అనుసంధానం కావడం మానసిక ఆరోగ్యానికి చాలా ప్రయోజనకరంగా ఉంటుంది. చెట్ల పచ్చదనం, స్వచ్ఛమైన గాలి, అందమైన ఆకాశం కింద సమయం గడపడం వల్ల మన శరీరంలో డోపమైన్, సెరోటోనిన్ వంటి హార్మోన్లు పెరుగుతాయి. తద్వారా రిలీఫ్ గా అనిపిస్తుంది. పార్కులో ఉదయం లేదా సాయంత్రం నడవడం వల్ల రోజంతా ఉన్న అలసట ,ఆందోళన తొలగిపోతుంది.
సానుకూల మనస్తత్వం..
రాత్రి పడుకునే ముందు కృతజ్ఞతా భావాన్ని అలవర్చుకోవడం మానసిక ప్రశాంతతను పొందడానికి చాలా ప్రభావవంతమైన మార్గం. రోజంతా ఏ చిన్న మంచి విషయాలు జరిగినా, వాటిని డైరీలో నమోదు చేసుకోవాలి. ఈ అలవాటు మనకు సానుకూలంగా ఆలోచించే అలవాటును పెంపొందించుకోవడానికి సహాయపడుతుంది. జీవితంలోని మంచి విషయాలపై దృష్టి పెట్టడానికి అవసరమవుతుంది.
ప్రియమైనవారితో మాట్లాడటం..
తరచుగా మనం చాలా ఒంటరిగా ఉన్నామని భావిస్తాము, కానీ మన భావాలను మనకు దగ్గరగా ఉన్న వారితో కొన్ని విషయాలు పంచుకోవడం వల్ల మన మనసు తేలికగా ఉంటుంది. నేటి డిజిటల్ ప్రపంచంలో, మనం సోషల్ మీడియాలో కనెక్ట్ అయినప్పటికీ, వాస్తవానికి కమ్యూనికేషన్ లోపం ఉంది. మీ భావాలను సన్నిహిత మిత్రుడు, కుటుంబ సభ్యుడు లేదా భాగస్వామితో పంచుకోవడం అనేది మానసిక ఆరోగ్యానికి దివ్యౌషధంలా పనిచేస్తుంది. సన్నిహితులతో మాట్లాడటం ఒత్తిడిని తగ్గిస్తుంది, భావోద్వేగాలను అర్థం చేసుకోవడంలో సహాయపడుతుంది. సంబంధాలను పెంచుతుంది.