Chemo Brain : కీమో బ్రెయిన్ కు వ్యాయామంతో ఉపశమనం.. పరిశోధనలో ఆసక్తికర అంశాలు..

సాక్షి లైఫ్ : క్యాన్సర్ చికిత్సలో భాగంగా ఇచ్చే కీమోథెరపీ వల్ల రోగులు ఎదుర్కొనే ప్రధాన సమస్యల్లో 'కీమో బ్రెయిన్' ఒకటి. చికిత్స సమయంలో జ్ఞాపకశక్తి తగ్గడం, ఆలోచనా శక్తి మందగించడం, మానసిక అలసట వంటి లక్షణాలతో రోగులు ఇబ్బంది పడుతుంటారు. అయితే, క్రమం తప్పకుండా చేసే వ్యాయామం ద్వారా ఈ సమస్య నుంచి ఉపశమనం పొందవచ్చని తాజా పరిశోధనలో వెల్లడైంది. జర్నల్ ఆఫ్ నేషనల్ కాంప్రెహెన్సివ్ క్యాన్సర్ నెట్‌వర్క్ (JNCCN) మార్చి 2026 సంచికలో ఈ వివరాలను ప్రచురించారు.

ఇది కూడా చదవండి..బ్లడ్ క్యాన్సర్ ను గుర్తించడానికి ఎలాంటి పరీక్షలు చేస్తారు..?

ఇది కూడా చదవండి.. కొరియన్ డైట్ తో వేగంగా బరువు తగ్గడం ఎలా..?  

ఇది కూడా చదవండి..డిప్రెషన్ ఉన్న వారిలో ఎలాంటి మార్పులు కనిపిస్తాయి..?

నడకతోనే మేలు..

యూనివర్శిటీ ఆఫ్ రోచెస్టర్ మెడికల్ సెంటర్‌కు చెందిన పరిశోధకులు మొత్తం 687 మంది రోగులపై ఈ అధ్యయనం నిర్వహించారు. 'ఎక్స్‌క్యాప్' (EXCAP) పేరుతో వీరికి ఒక ప్రత్యేక వ్యాయామ ప్రణాళికను సూచించారు. ఇందులో ప్రధానంగా రోజూ క్రమం తప్పకుండా నడవడం, రెసిస్టెన్స్ బ్యాండ్స్ సాయంతో చేసే తేలికపాటి కసరత్తులు ఉంటాయి.

కీమో బ్రెయిన్ అంటే ఏమిటి..?

కీమోథెరపీ తీసుకుంటున్న సమయంలో రోగులు ఎదుర్కొనే మానసిక మార్పులను కీమో బ్రెయిన్ అంటారు. దీనివల్ల ఏకాగ్రత దెబ్బతినడం, పేర్లు లేదా తేదీలు మర్చిపోవడం వంటి ఇబ్బందులు ఎదురవుతాయి. సాధారణంగా రోగులు అలసట కారణంగా వ్యాయామానికి దూరంగా ఉంటారు. వ్యాయామం చేయని వారు వారి సాధారణ నడకను కూడా 53 శాతం మేర తగ్గించినట్లు పరిశోధకులు గుర్తించారు.

ప్రధాన ఫలితాలు ఇవే..

ప్రతి రెండు వారాలకొకసారి కీమో తీసుకునే రోగుల్లో ఈ వ్యాయామం అద్భుతమైన ఫలితాలను ఇచ్చిందని పరిశోధకులు వెల్లడించారు. వ్యాయామం చేసిన రోగుల్లో ఆలోచనా శక్తి, జ్ఞాపకశక్తి మెరుగ్గా ఉన్నట్లు గుర్తించారు. శారీరక శ్రమ వల్ల మెదడుకు రక్త ప్రసరణ పెరిగి, మానసిక అలసట తగ్గుతుందని నిపుణులు చెబుతున్నారు. క్లినిక్‌లకు వెళ్లి ఖరీదైన చికిత్సలు చేయించుకోవడం కంటే, ఇంట్లోనే చేసే ఈ చిన్నపాటి వ్యాయామాలు ఎంతో సురక్షితమైనవని పరిశోధకులు తెలిపారు.

క్యాన్సర్ చికిత్సలో భాగంగా వ్యాయామాన్ని కూడా ఒక భాగంగా చేర్చాలి. దీనివల్ల రోగులు తమ పనులను తాము చేసుకునేలా, ఆత్మవిశ్వాసంతో ఉండేలా చేయవచ్చని ఈ పరిశోధనలో కీలక పాత్ర పోషించిన డాక్టర్ కరెన్ ముస్టియన్ చెబుతున్నారు. 

చికిత్సలో..

క్యాన్సర్ రోగులు చికిత్స సమయంలో కేవలం విశ్రాంతి మాత్రమే కాకుండా, నిపుణుల సలహాతో వారి శరీర సామర్థ్యానికి అనుగుణంగా వ్యాయామం చేయాలని వైద్యులు సూచిస్తున్నారు. ముఖ్యంగా నడక వంటి అలవాట్లు వారి జీవన ప్రమాణాలను మెరుగుపరుస్తాయని ఈ పరిశోధన స్పష్టం చేస్తోంది.

ఇది కూడా చదవండి..ఒత్తిడి, ఆందోళనను తగ్గించడానికి బెస్ట్ ఫుడ్ ఏది..?

ఇది కూడా చదవండి..మార్నింగ్ వాక్ చేసేటపుడు ఈ ఆరు విషయాలు గుర్తుంచుకోండి..ఎందుకంటే..?

ఇది కూడా చదవండి..బ్లడ్ క్యాన్సర్‌లో ఎన్ని రకాలు ఉన్నాయి..?

గమనిక: ఇది కేవలం సమాచారంగా మాత్రమే భావించండి.. ఈ సమాచారం ఆధారంగా ఆరోగ్య సమస్యలకు సంబంధించిన నిర్ణయాలు తీసుకోవద్దు. అందుకోసం వైద్య నిపుణులను సంప్రదించండి.