Vision Declining With Age : వయసుతో పాటే చూపు మందగిస్తోందా..? ‘ఏఎమ్‌డీ’ ముప్పు కావచ్చు.. జాగ్రత్త..!
సాక్షి లైఫ్ : వయసు పెరిగే కొద్దీ శరీరంలో అనేక మార్పులు చోటుచేసుకోవడం సహజం. ఎముకల సాంద్రత తగ్గడం, కండరాల పటుత్వం క్షీణించడం వంటి సమస్యలతో పాటు దృష్టి లోపాలు కూడా క్రమంగా మొదలవుతాయి. సాధారణంగా 50 ఏళ్లు దాటిన మహిళల్లో మెనోపాజ్ వల్ల వచ్చే కీళ్ల నొప్పులు, పురుషుల్లో 60 ఏళ్ల తర్వాత ప్రొస్టేట్ సమస్యలు ఎలాగైతే పెరుగుతాయో.. అలాగే స్త్రీ, పురుషులిద్దరిలోనూ వయసుపైబడే కొద్దీ చూపు మందగించడం సర్వసాధారణం.
అయితే, వృద్ధాప్యంలో చూపు తగ్గడానికి కేవలం కంటిశుక్లం (cataracts) మాత్రమే కారణం కాదు. చాలామందిలో 'ఏజ్ రిలేటెడ్ మ్యాక్యులర్ డీజనరేషన్' (AMD) ప్రధాన కారణంగా నిలుస్తోంది. దీనివల్ల కంటిలోని రెటీనా మధ్యభాగం దెబ్బతిని దృష్టి శాశ్వతంగా మసకబారే ప్రమాదం ఉంది.
ఇది కూడా చదవండి..తల్లిపాలే శిశువు భవిష్యత్తుకు, ఆరోగ్యపరిరక్షణకు పునాది..
ఇది కూడా చదవండి..ఆహారంలోని పురుగుమందులు దీర్ఘకాలంలో ఆరోగ్యాన్ని ఎలా ప్రభావితం చేస్తాయి..?
ఇది కూడా చదవండి..డిప్రెషన్ ఉన్న వారిలో ఎలాంటి మార్పులు కనిపిస్తాయి..?
ఏమిటీ మ్యాక్యులర్ డీజనరేషన్ (AMD)..?
కంటి వెనుక భాగంలో ఉండే రెటీనా కేంద్ర బిందువును ‘మ్యాక్యులా’ (Macula) అంటారు. మనం ఎదురుగా ఉన్న వస్తువులను స్పష్టంగా చూడటానికి, అక్షరాలు చదవడానికి, రంగులను గుర్తించడానికి, మనుషుల ముఖాలను పోల్చుకోవడానికి ఈ మ్యాక్యులా అత్యంత కీలకం.
వయసు పైబడటం వల్ల ఈ మ్యాక్యులా లోపలి కణాలు క్రమంగా బలహీనపడటాన్ని ‘ఏజ్ రిలేటెడ్ మ్యాక్యులర్ డీజనరేషన్’ అంటారు. ఈ సమస్య ప్రారంభ దశలో ఎలాంటి నొప్పిగానీ, స్పష్టమైన లక్షణాలుగానీ కనిపించవు. ఫలితంగా వ్యాధి తీవ్రరూపం దాల్చేవరకు చాలామంది దీనిని గుర్తించలేరు.
ముప్పు ఎవరికి ఎక్కువ..?
సాధారణంగా 55 ఏళ్లు దాటిన వారిలో ఏఎమ్‌డీ వచ్చే ప్రమాదం పెరుగుతుంది. ఈ అంశాలు దీని తీవ్రతను మరింత పెంచుతాయి. వంశపారంపర్యంగా కుటుంబంలో ఎవరికైనా ఏఎమ్‌డీ సమస్య ఉంటే, తర్వాతి తరాలకు ఈ ముప్పు పొంచి ఉంటుంది. ధూమపానం.. పొగతాగే అలవాటు ఉన్నవారి కంటి రక్తనాళాలు దెబ్బతిని, దృష్టి లోపం వేగంగా ముదిరే ప్రమాదం ఉంది. జీవనశైలి రుగ్మతలు..అధిక రక్తపోటు (bp), పెరిగిన చెడు కొలెస్ట్రాల్, ఊబకాయం, శారీరక శ్రమ లేకపోవడం వంటివి కంటి ఆరోగ్యానికి చేటు చేస్తాయి.
ప్రధాన లక్షణాలు.. గుర్తించడం ఎలా..?
పుస్తకాలు లేదా మొబైల్ చూస్తున్నప్పుడు మధ్యభాగంలోని అక్షరాలు అస్పష్టంగా, మసకగా కనిపించడం. వంకరగా కనిపించే గీతలు: కిటికీ చట్రాలు, తలుపు అంచులు లేదా స్ట్రెయిట్ లైన్లు వంకరగా, అలల మాదిరిగా కనిపించడం ఏఎమ్‌డీ ప్రధాన లక్షణం. ఎదురుగా ఉన్న వ్యక్తి ముఖం సరిగ్గా గుర్తుపట్టలేకపోవడం, చూపు కేంద్రంలో నల్లటి మచ్చ లేదా ఖాళీ ప్రదేశం కనిపించడం. రంగుల తీవ్రత తగ్గడం, తక్కువ కాంతిలో వస్తువులను గుర్తించడంలో తీవ్ర ఇబ్బంది కలగడం.
నివారణ..నియంత్రణ మార్గాలు..
ఏఎమ్‌డీని పూర్తిగా తిప్పికొట్టలేకపోయినా, ప్రారంభ దశలోనే గుర్తిస్తే జీవనశైలి మార్పులతో చూపును కాపాడుకోవచ్చని నేత్ర నిపుణులు స్పష్టం చేస్తున్నారు. క్రమం తప్పకుండా కంటి పరీక్షలు..50 ఏళ్లు దాటిన వారు ఏడాదికి కనీసం ఒకసారి నిపుణులైన కంటి వైద్యుడి వద్ద ఫండస్ (Retina) పరీక్ష చేయించుకోవాలి. పొగతాగడం మానాలి..ధూమపానం కంటి నరాలకు తీవ్ర హాని కలిగిస్తుంది కాబట్టి దానికి దూరంగా ఉండటం ముఖ్యం. బీపీ, షుగర్ అదుపులో..రక్తపోటు, మధుమేహం, కొలెస్ట్రాల్ స్థాయిలను కచ్చితమైన నియంత్రణలో ఉంచుకోవాలి.
ఆకుకూరలు పాలకూర వంటివి, క్యారెట్లు, సీజనల్ పండ్లు, ఒమేగా-3 ఫ్యాటీ యాసిడ్లు పుష్కలంగా ఉండే చేపలు వంటి ఆహారాలను నిత్యం తీసుకోవడం వల్ల మ్యాక్యులా పనితీరు మెరుగవుతుంది. బరువు నియంత్రణ.. రోజూ కనీసం 30 నిమిషాల పాటు నడక లేదా తేలికపాటి వ్యాయామం అలవాటు చేసుకోవాలి. కంటి చూపులో కొద్దిపాటి తేడా కనిపించినా, సరళరేఖలు వంకరగా తోచినా వృద్ధాప్య లక్షణమని నిర్లక్ష్యం చేయకుండా వెంటనే రెటీనా స్పెషలిస్ట్‌ను సంప్రదించడం అత్యంత ఆవశ్యకం.
ఇది కూడా చదవండి..బేబీ వాకర్స్ తో పిల్లలు వేగంగా నడవగలుగుతారా..?
ఇది కూడా చదవండి..ఒత్తిడి, ఆందోళనను తగ్గించడానికి బెస్ట్ ఫుడ్ ఏది..?
ఇది కూడా చదవండి..వాక్సిన్ గురించి వాస్తవాలు- అవాస్తవాలు..
గమనిక: ఇది కేవలం సమాచారంగా మాత్రమే భావించండి.. ఈ సమాచారం ఆధారంగా ఆరోగ్య సమస్యలకు సంబంధించిన నిర్ణయాలు తీసుకోవద్దు. అందుకోసం వైద్య నిపుణులను సంప్రదించండి..
